Comerciantenan Uni na Aruba (CUA) a duna un conferencia di prensa pa splica cu e cifra di BBO pa januari di aña 2023 ta bay ta 7.5% y no 7%, manera Gobierno di Aruba a duna di conoce algun dia pasa.

Di esaki, presidente di CUA, Frans Ponson a señala cu un comerciante cu ta bende un producto por ehemplo na 100 florin y cu segun gobierno e cifra ta bay ta 7%, e prijs pa bende na pueblo ta bira 107. E BBO ta loke comerciante lo duna na gobierno, no loke comerciante mester cobra na pueblo. “Ora nos duna gobierno e 7% di e 107 florin, ta 7.49; pero e comerciante a cobra pueblo 7 florin, kiermen 7 florin ta kita, loke gobierno kier pa nos paga nan. Nos ta haya 99,51 no 100 florin.”

Ta p’esey cu nan kier corda pueblo kico di berdad ta bay paga y cu e cifra real ta cu nan ta bay cobra 107,52 florin, pa motibo cu ora comercio ta bay duna gobierno e 7%, nan ta bay haya nan 100 florin back.

Di mesun manera el a splica cu reforma fiscal dos mester a bin, pero Covid-19 a yega y gobierno a par’e. “Nos tabatin dos aña pa nos traha e reforma fiscal, nos por a yama tur e gremionan, papia cu nan y nunca nos no a tende nada. Na cuminsamento di aña aki, diripiente nos a bin tende cu ta bin un BTW unda cu Comerciantenan Uni nunca tabata contra BTW, nos tabata contra di hink’e aden den dos of tres luna, pasobra BTW tin hopi cosnan administrativo”, el a bisa.

Ora cu Comerciantenen Uni a tuma nota cu gobierno a papia cu no ta bin cu BTW, sino cu ta aumenta e BBO, e organisacion aki a reacciona. Nan no ta compronde cu e tarifa ta bay aumenta, pero cu hotel cu ta trece hopi container no ta paga 1 florin di BBO.

“Nos mesun profesionalnan di gobierno ta bin cu un sistema pa gaba cu comercio, mi no sa ken ta bin cu e ideanan aki” Ponson a comenta. Esaki en bes di paga na entrada, cu e ora ey hotelnan tambe tin cu pag’e y comerciantenan cu no ta cumpliendo cu caha di gobierno e ora ey tin cu bay nan tras. Gobierno mes a indica cu tin 40% di comerciantenan cu no ta cumpli cu caha di gobierno.

“Pero no, e ta mas facil pa nos coy un grupito cu ta paga, laga nan paga” Ponson a bisa.

Esaki ta bay trece como consecuencia un inflacion grandisimo pa pueblo, manera el a sigura, y ta bay haya supermercadonan cu ta bay cera y nan ta bay cumpra nan mes afo. “Nos gobierno practicamente ta mustra cu ta traha pa bay contra nos mesun comercio, nos ta aumenta e prijs pa e grupito cu ta pagando, nan so nos ta bay ataca”, el a expresa.

Ponson a trece dilanti cu e no kier tende pa gobierno tilda comerciante cu nan ta abusa di prijs. Den nan pensamento, e aplicacion di BTW di un forma completo lo ta miho pasobra tur comerciante ta bay cumpli cu caha di gobierno.

Di su parti, Francis Saladin a mustra un articulo di corant di aña 2019 cu tabata informa cu BBO di 6% tabata temporal y cu “esey ta un palo pasobra aworaki nos ta yega na 7.5%”.

El a splica cu ta existi e pensamento robes cu consumidor solamente ta paga BBO, pero e realidad ta cu un compania tambe ta paga e impuesto aki, pa motibo cu e compania tambe ta compra servicio y productonan.

“Ora un hende ta chica nos pos of un hende ta bin haci mantenemento, tur tipo di servicio como abogado, accountant, cu nos como empresa ta cumpra como producto of servicio, nos tambe ta paga BBO mescos cu e consumidor ora ta bay supermercado of cualkier tienda”, Saladin a señala.

Esey tambe ta nifica cu nan prijs operacional tambe ta subi y nan gastonan operacional tambe ta subi “ta jammer cu pa hopi biaha gobierno ta tilda comercio cu nos ta subi prijs, awor e realidad ta, ken a subi e prijs?”, Saladin a comenta.

El a señala cu e ta bay bira dificil pa un comerciante local competi cu un comerciante situa por ehempel na Miami cu por manda nan productonan pa Aruba pa e no paga BBO y cu a propone yen manera pa no afecta e consumidor tanto pero nan a scoge solamente pa bay tras di esunnan cu ta paga.

Pa finalisa, el a bisa cu problema di BTW tabata cu gobierno a bisa 18% y tur hende a spanta pero cu e porcentahe ey no ta realistico manera Saladin a sigura, cu tabatin e oportunidad pa introduci e BTW den un aña aproximadamente pero cu por a cuminsa cobr’e na frontera ora producto ta drenta mientras por a negocia kico e porcentahe lo bira factibel pa pais of pa pueblo, “esey ta, ta un negociacion pa sinta y soluciona e problemanan hunto”, Saladin a expresa.