Riba Dialuna pasa di 11:30 mainta na un crèche situa na Bloemond yama Centro di cuido Moises, e leidsternan a bati alarma na 911 ora nan a haya nan mes cu un situacion alarmante, unda cu un baby di 6 luna a stop di hala rosea riba nan. Di biaha a despacha Ambulance cu urgencia pa e sitio y aki paramediconan a cuminsa cu reanimacion.
Na e sitio, Ambulance su personalnan tabata trahando duro riba e baby despues di a tuma over for di e leidsternan. Loke ta di remarca den e caso aki ta cu Polis no a keda informa for di e personalnan di Centro di alarma 911 di e caso serio aki, ta un patruya pasando a topa cu e situacion y a bati alarma y notifica autoridad competente pa presenta, debi cu na e sitio lo a topa cu sanger rond di unda e personalnan di ambulance tabata atende cu e baby mucha muhe di 6 luna.
Polisnan a cera tur rotonde, pa momento cu e ambulance a sali a haya caminda liber la yega hospital basta lihe pa dokternan atende cu e criatura. Departamento tecnico tambe a presenta na e crèche pa haci un investigacion grandi relaciona cu e caso aki.
For di e crèche a compronde cu nan a traha alma y cuerpo momento cu a topa cu e baby den e situacion te ora cu ambulance a presenta.
Pa 6:43pm, a drenta e noticia debastador cu e baby en cuestion, yama Elizienne E. De Cuba, a fayece.
Bon Dia Aruba a manda pregunta por escrito na minister di Asuntonan Social, Rocco Tjon. Mirando e caso recien ainda di Baby Noah y cu siman pasa a presenta e poster y buki di seguridad na centronan di cuido di mucha.
A puntra ki medida gobierno ta tumando pa sigura cu hende cu ta traha na crèche ta capacita pa esaki. Tambe a puntra si ta evaluando pa bin cu mas accion, por ehemplo, inspeccion di crèche. Sinembargo, te ciere di edicion no a ricibi ningun contesta di e mandatario.
