(AP) — Cinco aña despues cu storianan di su persona a pone e movemento #MeToo explota, Harvey Weinstein ta bayendo huicio na e ciudad unda antes e tabata un colossus na e premionan Oscar.
Ya cumpliendo cu un sentencia di 23 aña pa violacion y abuso sexual na New York, e ex-magnate di pelicula, di 70 aña di edad, ta enfrenta diferente acusacion incluyendo varios cu fiscalnan ta bisa a tuma lugar durante e siman clave di premionan Oscar na Los Angeles. Seleccion pa hurado pa un huicio di ocho siman ta cuminsa awe.
A acusa Weinstein cu cuatro cargo di violacion y siete otro cargo di abuso sexual involucrando cinco muher, kende ta bay aparece den corte anonimamente pa conta nan storia. Weinstein a declara inocencia.
Cuatro otro muhe ta bay ta permiti pa testigua pa duna relato di abusonan sexual di Weinstein cu no a conduci na cargonan, pero cual fiscalnan ta spera lo mustra e hurado cu e tabatin propensidad pa comete actonan asina.
Cuminsando na añanan 1990, Weinstein, a traves di e compania Miramax cu e tabata dirigi cu su ruman homber, tabata un innovador den ehecuta campañanan agresivo y amplio promoviendo nominadonan pa premionan di Academia. E tabatin un exito sin rival, pushando peliculanan manera Shakespeare in Love y The Artist na gana miho pelicula, y convertiendo entre un di e hombernan cu mas a ricibi gradicimento durante discursonan di aceptacion di Oscar.
Miramax y su sucesor The Weisntein Co. tabata basa na New York, unda Weinstein tabata biba y traha, pero esey no a disminui su presencia den Hollywood.
Tabata durante siman di Oscars na 2013, tempo cu Jennifer Lawrence a gana un premio di Academia pa e pelicula Silver Linings Playbook di Weinstein Co. y Quentin Tarantino a gana pa skirbi Django Unchained di e compania, cu cuatro di e supuesto 11 crimen a tuma lugar.
Manera mayoria di e incidentenan den e acusacion, esakinan a sucede disfraza como reunionnan di negoshi na hotelnan luhoso na Beverly Hills y Los Angeles, cual Weinstein tabata usa como su sede na California y unda por a mir’e durante temporada di premio y resto di aña. Tabata trat’e como mas cu un VIP. Na un audiencia prome cu e huicio, e chauffeur cu tabata transporta Weinstein rond di Los Angeles a testigua cu hasta e tabata permiti pa saca hasta mil dollar cash den nomber di Weinstein for di front desk unda e magnate tabata keda.
Pa ora storianan den The New York Times y The New Yorker na october di 2017 a ocasiona su ruina, poder di Weinstein pa aparentemente forsa peliculanan gana premio a disminui, y su compania a cay den problema financiero. Ya e no tabata e Rey di Oscar mas.
E huicio na Los Angeles probablemente ta bay ta menos un spectaculo cu e procedimentonan na New York, no solamente pasobra e ta un secuela y Weinstein ya ta cumpliendo un sentencia largo.
No tin entrada na e corte unda e huicio ta bay tuma lugar. Weinstein tampoco ta bay ta visible pa medionan di comunicacion of manifestantenan pafo, manera si e tabata na Manhattan, ya cu e ta bay den corte direct for di prison via un gang chikito unda no ta permiti camaranan.
Apenas un manyen di reportero, incluyendo dos artista di sketch ta bay ta permiti den e corte cada dia, compara cu e varios decena na New York.
Weinstein tambe ta bay ta representa pa abogadonan diferente na Los Angeles, Alan Jackson y Mark Werksman. Nan a expresa preocupacion cu e peliculanan ta bay hunga un rol den e huicio.
E pelicula “She Said”, cu ta ficcionalisa e trabao di dos reportero di New York Times y nan storianan riba Weinstein ta bay lansa memey di e huicio, dia 18 di november. Abogadonan di Weinstein a perde un mocion pa retrasa e proceduranan pa motibo di e pelicula, cu e hues rechasando nan argumento cu publicidad rond di esaki por crea prehuicio den e hurado contra Weinstein.
Huicio di Weinstein ta un di varios cu conexion na #MeToo cu a cuminsa of ta bay cuminsa, mientras e di cinco aniversario di e movemento riba rednan social ta pasa, incluyendo e huicio pa violacion di actor di That ‘70s Show, Danny Masterson na e mesun corte cu Weinstein, y e huicio civil pa abuso sexual na New York contra Kevin Spacey.
