Nos por observa, cu cierto satisfaccion, cu tin un intento fuerte pa mehora e situacion di estadistica oficial di nos comunidad y economia. Pa demasiado tempo e tarea hopi importante aki a keda un huerfano na man di varios gobierno, y no tabata por a entrega e cifranan na tempo riba varios tereno. Esaki tabata blanco di critica na varios ocasion den e mesun Editorial aki, mustrando con e tardanza den entrega di estadistica confiable y na tempo no ta stroba solamente gobernacion mes den e tareanan multiple di maneho, planificacion y supervision, sino tambe tabata un problema pa sector priva, cu no por planifica na un manera adecuado sin cifra reciente riba varios tereno economico y social.

Ta di spera cu di awor en adelante e departamento cu mester percura pa tur esaki tuma lugar haya tambe e recursonan necesario pa haci nan trabao, y cu ademas no lo sucede mas loke a pasa durante gobernacion anterior, unda a trece manipulacion politico den e departamento, te na e grado di sustitui un director pa un trio di manager, di cual ningun tabatin e background profesional pa tuma encargo di e departamento. Te awe nos no ta comprende ta ki meta politico kier a logra cu esaki, pasobra manera bisa caba, mal funcionamento di un servicio clave manera esaki ta funciona manera un boomerang riba trabao gubernamental en general.

Redaccion di e medio aki cada tanto tempo ta sigui e cifranan basico cu e departamento ta produci. No pa satisface nos curiosidad (profesional) so, sino tambe pasobra tin varios tendencia den e cifranan cu ta merece nos atencion. Ehemplo di esaki ta e desaroyo demografico general, manera e forma con composicion di nos comunidad ta cambiando, a traves di e tendencianan di nacimento, fayecimento, y entrada/salida di persona. Un di e tendencianan aki den ultimo añanan ta e caida fuerte den e cantidad di nacimento, cu pa e promer mitar di 2022 ta mas fuerte ainda cu e tabata caba. Den ultimo decada nos por a mira caba un tendencia fuerte di reduccion di e cantidad di nacimento, di un nivel di entre 1300 pa 1200 nacimento pa aña, te na 1008, pa ser exacto, na 2021. Pa e promer mitar di 2022 a registra un cantidad di 350 nacimento, loke ta implica pa e aña, si e tendencia aki continua, cu lo tin un reduccion nobo te na nivel di quizas 800 en total.

Pakico esaki ta asina importante? Pasobra e tendencia di reduccion aki den e ultimo decada a percura caba pa un reduccion grandi di e cantidad di mucha den edad di bay educacion pre-escolar y primario, por ehemplo. Pa duna un impresion di kico ta papiando aki: di 2019 pa fin di 2021, apenas dos aña, den e categoria di 0-4 aña tabatin 1227 mucha menos. Den e categoria 5-9 aña tabatin na fin di 2021 616 mucha menos registra. Tuma na cuenta cu e cifranan di poblacion ta inclui mucha cu eventual a bin biba na Aruba, o a sali di e isla, y no solamente esunnan cu a nace aki. Pa completa e situacion: e categoria di 10-14 aña tambe ta mustra pa e mesun periodo un crecimento negativo di casi 5%.

Tur esaki ta bay tin un impacto grandi riba e necesidad di cupo den enseñanza basico na promer instante, pero tambe den enseñanza avanza despues. Awor, un cinico por bisa: “Net bon, anto nos por economiza riba esey y nos por usa e recursonan ey pa otro cos…” Si nos ta observa cifra so, esey ta berdad, al fin y al cabo, si dado momento nos tin casi 2000 mucha menos pa bay scol, esey ta casi 80 klas di 25 alumno cu no mester atende. Y ya cu nos tin escasez creciente di maestro pa enseñanza basico, esey ta cay net bon, lo bo por pensa. Realidad di gobernacion sin embargo ta requeri cu mester wak mas leu cu e aparente ‘bentaha’ aki; ta necesario pa planifica futuro economico y social di e pais aki, cu ta obliga nos proyecta con nos ta atende e escasez cu ta bay tin riba mercado laboral, ora e grupo reduci aki yega na edad di bay traha. Nos ta depende caba fuertemente riba entrada di trahador di exterior pa mantene nos economia andando, y esey cu e tendencia aki lo bira hopi mas fuerte. Esey ta mal noticia pa esnan cu ta practica xenofobia, pero en todo caso e ta establece un cuadro diferente pa planificacion di enseñanza promer, y despues pa economia.

Pero, den tur esey, tin un parti di e storia aki cu nos no a conta: esey ta cu e cifranan aki ta encera solamente persona cu ta residencia oficialmente na Aruba. Esey no ta culpa di e departamento aki, nan no ta dispone, nos ta supone, di cifra di e cantidad di hende cu di forma ilegal ta yama Aruba nan cas… Y cuanto mucha tin entre nan cu ta bay scol o no ta bay scol, tampoco nos ta topa den e estadisticanan aki. Nos ta kere e cifra di ilegal Venezolano cu nos promer ministro a menciona: alrededor di 16.000. Hunto nos ta papiando di posiblemente 20.000 persona indocumenta, mientras di 2019 pa 2021 nos poblacion oficial a baha cu casi 1.800 persona… Nos ta keda resolve problema den e lugar aki sin planifica…? Y nos no ta mira nada, ni sikiera inicio di un debate…?

LJMADURO – 07-OCT-2022