(AP) – Un hues a dicidi di atrasa e huicio entre Musk y Twitter pa asina duna e CEO di Tesla mas tempo pa cera e trato di 44 biyon dollar pa adkiri e compania despues di a pasa lunanan luchando pa sali di e trato aki.
Musk a pidi pa pone un pausa riba e huicio binidero, unda cu e biyonario tabata premira di no por haci un bon trabao contra Twitter su demanda pa forsa su persona cumpli cu e acuerdo haci den april. Musk a rebiba e oferta riba dialuna pero a bisa cu e mester di tempo pa pone e finanzas den ordo.
Kathaleen St. Jude McCormick, hefe di Delaware Chancery Court a bisa diahuebs cu Twitter y Musk awo tin te cu dia 28 di october pa clausura e trato. Nificando cu e huicio originalmente den plan pa dia 17 di october, lo tuma luga den November si no logra cera e trato.
Twitter a puntra McCormick pa sigui cu e huicio, bisando cu e biyonario no kier acepta e obligacionnan den e contract pa cu e acuerdo den april pa adkiri e compania y haci esaki priva.
Twitter a desmenti Musk su acusacion cu e compania ta nengando di acepta su oferta nobo. Musk a bisa na Twitter cu e lo cumpra e compania, despues di a acusa e compania di sconde informacion tocante “spam bot” riba e servicio.
