Minister di Husticia y di Asuntonan Social, Rocco Tjon, ayera mainta a ofrece un conferencia di prensa pa asina ey informa comunidad tocante overtime ya cu e ta considera cu cierto medionan di comunicacion ta purba di saca e informacion corecto for di contexto.

Pa cu esaki, minister Tjon a sigura cu ya caba minister di Finansa Xiomara Maduro a elabora riba e tema aki algun dianan pasa pa motibo cu ta algo cu ta toca e situacion financiero di e pais, pero cu tambe e ta toca e parti di maneho di personal na unda cu prome minister Evelyn Wever-Croes a emiti un comunicado unda ta papia di un maximo di 40 ora, pero na mesun momento tambe a puntra tur director y personanan envolvi pa entrega un plan con nan ta bay maneha overtime pa nan departamento.

Di esaki, minister Tjon a bisa cu esaki tin cosecuencianan pa loke ta e parti di siguridad y vooral den departamentonan cu ta resorta bou di Ministerio di Husticia, pa e motibo aki ya caba segun minister Tjon a indica, nan a reuni riba e topico aki den e plataforma den cual e top di husticia ta representa pero tambe nan tabatin un director overleg cu tur e departamentonan unda cu den e reunion ey nan a presenta e plan con nan ta bay percura pa e reduccion di overtime, teniendo na cuenta cuater punto cu ta sumamente importante.

E puntonan aki ta e siguridad cu mester keda brinda na pueblo, e servicio tambe cu mester keda brinda na cada ciudadano, sin lubida tambe e palabracionnan local y internacional cu tin pa loke ta trata e presencia na cierto infrastructura manera aeropuerto, por ehemplo.

Un punto hopi importante di esakinan, ta e siguridad di tur e trahadonan cu ta den e prome linea, “first responde” unda cu den cuadro di esaki, tambe tin cierto palabracionnan caminda nan a yega na un plan cu minister Tjon a comunica na sindicatonan, specialmente Sindicato di Polis pa keda garantisa e siguridad di tur, “e plan aki ta conta cu aprobacion tambe di Departamento di Recurso Humano”, el a bisa.

Den reunion cu e departamento aki, minister Tjon a menciona cu nan a bolbe papia riba e plannan cu a wordo entrega y cu nan ta wak tambe cu e cambionan ta dunando e balor agrega pa loke ta e reduccion di overtime teniendo na cuenta e cuater punto di salida.

“P’esey mi ta haya importante pa aclaria y otro siman nos tin un reunion pendiente cu tur e sindicatonan cu a solicita esaki pasobra lo cual a wordo indica den e carta , nan ta papia di 40 ora pero na mesun momento, nan ta papia di un plan cu cada director y cada dienst mester entrega pa splica con nan ta bay maneha e parti di overtime”, el a señala.

Segun el a indica, esey a sucede den e departamentonan hudicial, prome cu e comunidado di 40 ora a sali y cu nan ta bay atene nan mes den bon palabracion cu minister presidente, cu minister di Finansa y tambe cu Departamento di Recurso Humano pa atene nan mes na e plannan cu a wordo entrega door di e diferente departamentonan hudicial “pa di e forma ey nos por reduci overtime, pero di otro banda tambe nos por keda garantisa siguridad externo pa comunidad di Aruba, interno tambe pa esnan cu ta eherce e trabou”.

El a agrega tambe cu den palabracionnan cu Departamento di Recurso Humano, for di su ministerio hunto cu e departamentonan nan ta bay keda monitor e desaroyo di con e overtime ta cana, pa motibo cu nan kier evita tambe pa na dado momento esnan cu ta traha e trabou no por haya esaki paga pa via cu no tin e presupuesto.

“P’esey ta asina importante pa nos keda monitoria e palabracionnan cu nos tin haci hunto cu e diferente departamentonan aki”, minister Tjon a comenta.

Pa e motibo aki el a considera importante aclaria e tema aki pa asina por tin trankilidad den e diferente departamentonan.

Den e presupuesto di Aruba, overtime ta keda presupuesta pa por proyecta esey den organisacion y pa motibo ey e ta forma parti di e presupuesto, e ta importante manera minister Tjon a bisa pa esaki wordo maneha den un manera corecto pa evita di surpasa lo cual a wordo presupuesta y cu a traves di cierto programanan y sistema cu nan a adkiri cu lo ta operacional otro aña, nan por maneha e parti di overtime hopi miho.

Di mesun manera, el a splica cu pa loke ta trata personeel sterkte den tur departamento ta un reto grandi y tin falta di personal, “esey ta un hecho, p’esey nos ta boga pa bin clasnan nobo den cuadro di retonan financiero cu nos ta wordo confronta cune, pero na mesun momento hunto cu e departamentonan nos ta bezig restructura diferente di nos procesonan, e manera con nos ta conduci e operacionnan pa asina ey tambe kisas bo tin mester di menos personal cu aworaki ta boga p’e”.

Esaki tabata un combinacion di percura pa emplea mas personal den cuadro di retonan financiero pero di otro banda tambe restructura ta critico riba e procesonan pa wak si di berdad mester di tanto personal pa e procesonan cu organisacion ta para pe, esey ta conta pa tur departamento como Brandweer, Migracion, Cuerpo Policial, entre otro.