Aruba a sigui unicamente un di e 13 recomendacion di CAft riba presupuesto 2022, cu ta pone e deficit financiero crece, y hunto cune e debe. Cu un paso asina ta dificil pa yega na e surplus di 1 porciento na 2023 manera ta palabra cu Hulanda.

Asina Profesor dr. Raymond Gradus a bisa Minister di Finanzas, Xiomara Maduro den un carta di 14 di September. E carta a keda publica riba website di CAft ayera. Manera ta conoci, CAft tin e tarea pa supervisa maneho financiero di Aruba na nomber di Gobierno di Reino y a reacciona riba e asina yama Najaarsnota 2022, cu ta adaptacion di e presupuesto 2022, esta e Proposicion di Cambio di Presupuesto, OWB.

Gradus ta mustra Minister Maduro cu interes riba prestamo ta subi cu mas deficit financiero cu ta haci e gasto di financiamento, esta e interes, mas halto ainda. Consecuentemente a recomenda pa Gobierno di Reino duna Aruba un aanwijzing y a informa Parlamento di Aruba di esaki tambe.

CAft ta usa e protocol cu Aruba a firma cu Hulanda na November 2018 como cuadro di midi. E protocol aki a keda alarga te cu fin di 2023 of te na momento cu e ley consenso di Reino riba supervision financiero, RAft drenta na vigor.

Hulanda a permiti Aruba pa desvia di e normanan palabra na 2022, pero e deficit no por tabata mas cu e sosten di likides cu tabatin mester aumenta cu prestamo riba mercado priva cu aprobacion di Gobierno di Reino. Un biaha mas CAft ta ilustra e diferencianan entre e forma con ta calcula e deficit y lo atende cu e punto aki den e di cuater reportahe di ehecucion.

E deficit di sector colectivo pa 2022 ta 155 miyon cu ta igual na 2.6 porciento di e Producto Interno Bruto, GDP. A logra reduci e deficit financiero cu 79 miyon florin, di 227 pa 148 miyon, pero esaki ta pa motibo di entrada incidental y e hecho cu no a inverti den proyecto RWZI na Bubali. CAft ta di opinion cu e entrada adicional mester bay pa reduci e deficit pa evita cu debe ta sigui crece. Sinembargo e ahustacionnan den presupuesto no ta structural. Algun cambio riba presupuesto mester tin un caracter structural, pero presupuesto no ta duna bista riba esaki.

E crecemento economico proyecta pa 2022 a keda ahusta di 7,9 pa 8,8 porciento y ta a base di esaki cu a aumenta e entrada di belasting cu 30 miyon, cu segun CAft ta hopi reserva basa riba e resultadonan te cu di dos kwartaal di e aña aki, unda e BBO, BAVP, tarifa di importacion y belasting riba ganashi a registra aumento. Ta premira un aumento di 20 pa 40 miyon adicional y como tal ta conseha pa aumenta e aumento di entrada di belasting cu otro 20 miyon.

E reduccion den loonbelasting cu Gobierno a duna mester keda compensa cu reduccion otro caminda, pa compensa e buraco, ya cu e entrada di loonbelasting ta cana atras di e crecemento economico. Te ainda Aruba no a tuma medidanan di compensacion.

E entrada for di actividadnan pa percura pa hisa cumplimento di pago di belasting a keda ahusta cu 20 miyon menos, pasobra a pospone e sosten di Hulanda pa mehora e proceso. CAft di otro banda ta urgi pa yega na un nivel adecuado di cumplimento y no mara esaki na un discusion andando riba sosten. E fortificacion di cumplimento ta un parti importante di e landspakket y Aruba a ricibi 3 miyon di Hulanda caba pa implementa e reformanan aki. Segun Profesor Gradus, ta spera cu awor ta tuma paso concreto y cu resultado cu entrada lo aumenta cu mas di 20 miyon.

Ningun solucion pa Serlimar

Minister Maduro a aumenta e pago di ganashi di companianan publico, entre otro Triple A y Setar y a apunta nan como entrada adicional structural. CAft no ta de acuerdo, ya cu e entradanan ta sensitivo na cambionan economico y como tal no ta structural. Como tal no por consolida presupuesto basa riba aumento di entradanan incidental. Particularmente mirando cu ainda Gobierno ta carga companianan manera Serlimar, Post NV y Arubus cu fondo publico. “Aruba mester desaroya un strategia multianual pa reduci e sosten aki.”

Locual CAft ta remarca ta cu den presupuesto 2022 no tin mas guia of maneho riba e problema pa hisa y cobra e tarifa pa piki sushi di parti di Serlimar. CAft ta bolbe enfatisa cu mester soluciona e problemanan di Serlimar y asina saca e suma di 3 miyon reserva pa e compania for di presupuesto 2022.

Gasto di personal

A baha e gasto di personal cu 7 miyon na 426 miyon, cu ta 8 miyon mas hopi compara cu e aña prome. E hecho cu Gobierno a bolbe parti di e 12.6 porciento na trahadonan por splica e aumento di gasto compara cu un aña pasa. CAft a constata na Juni cu e proposicion di Aruba pa corta den e reduccion di e 12.6, pa entre otro maximalisa e pago di overtime. Pero den su reaccion riba e reportahe di ehecucion di e di dos kwartaal di 2022, CAft a bisa cu e overtime ta mustra hasta un aumento compara cu 2021. Riba dje no a pone un maximo di overtime den e presupuesto 2022. Pa por cumpli cu e norma di personal na 2022, CAft ta bisa Minister Maduro pa bolbe ahusta e OWB, unda ta duna guia activo pa baha e gasto di overtime.

Den e proposicion di cambio di presupuesto ta baha e gasto di producto y servicio cu 15 miyon, cu ta nifica segun Profesor Gradus, cu Aruba a sigui parti di e recomendacion di CAft pa baha e gastonan aki structuralmente. Sinembargo, CAft a recomenda un reduccion di 39 miyon, cu ta nifica cu Aruba lo mester baha otro 24 miyon di su gasto pa producto y servicio.

Bon Dia Aruba lo amplia riba e carta di Profesor dr. Raymond Gradus den un proximo edicion, mirando cu e colegio no ta cambia di pensamento cu hasta cu e ahustenan, presupuesto 2022 no ta cumpli cu normanan palabra cu Hulanda.