Desde inicio di e aña aki e prijs pa bari di crudo West Texas Intermediate (WTI) a aumenta drasticamente yegando te na 114 dollar pa bari na mei 2022 y esaki debi na e crisis mundial causa pa e guera di Rusia versus Ucrania.

Sinembargo desde juli 2022 nos por a mira un reduccion substancial pa loke ta e prijs pa bari di crudo cu ya den e dianan aki a baha te na 86 dollar pa bari. Sin duda esaki ta un desaroyo sumamente positivo ya cu un reduccion di e prijs di crudo tin como consecuencia cu lo frena e aumento di costo di bida den nos pais. Nos por a experencia esaki caba durante e ultimo 2 lunanan caminda nos tur por a gosa gradualmente di un reduccion substancial di prijs di gasolin y diesel.

Prijs di crudo lo aumenta te $500 pa bari?

Y awor cu e prijs di crudo a conoce un reduccion substancial e ultimo tempo aki, den seno di nos opositornan y specialmente esnan di AVP a cuminsa grita cu gobierno mester bay hedge e prijs di heavy fuel oil (HFO) mas pronto posibel y p’asina evita cu den futuro cercano un aumento drastico di e prijs di HFO lo bay afecta seriamente e prijs di awa y coriente na Aruba.

Sinembargo den e mesun rosea nos mester recorda pueblo con den pasado e ex minister di energia di AVP, esta Mike de Meza cu su bola di cristal den man a grita na voz halto den sala di Parlamento cu prijs pa bari di crudo ta aumentando drasticamente y cu esaki lo yega te hasta na 500 dollar pa bari na 2015 y riba e locura hamas bisto aki e gobierno di AVP y Mike de Meza a dicidi di hedge e prijs di Heavy Fuel Oil na 92 dollar pa bari pa 3 aña largo. Tin un grabacion di Mike de Meza e tempo aya unda Mike a gaba masha hopi cu a logra hedge 2/3 parti y Mike de Meza den mesun grabacion aki a splica cu ohala por a hedge 100%. Tur esaki tabata e strategia pa Mike de Meza por a logra duna ordo pa hedge cu facilidad?

Prijs di crudo a baha te bao $30 pa bari !

Y kico a sosode despues cu a hedge e prijs di HFO na 92 dollar pa bari? Ni dos luna despues prijs di crudo a cay drasticamente y a yega te bao di 30 dollar pa bari mientras Aruba a keda paga e prijs di 92 dollar pa bari. Esaki a trece cune cu pueblo di Aruba a wordo horta of crioyamente bisa e hendenan aki a tira un para riba pueblo di 280 miyon florin, cual tabata e diferencia entre e prijs gehedged di 92 dollar y e prijs reduci di crudo riba mercado internacional durante e periodo menciona.

Experto riba kruk

Awe nos ta haya e mesun Mike de Meza aki hunto cu su gang den AVP ta grita tur dia cu gobierno actual mester hedge pa caba na un momento cu e prijs di crudo a baha substancialmente den e ultimo 2 lunanan aki. Pues e politico y ex mandatarionan di AVP a keda cu e mesun experticio riba kruk di algun aña pasa, esta di core grita ‘hedging’ sin haci un analisis prome di henter e situacion riba mercado mundial pa loke ta e desaroyo di prijs di crudo. Siguramente nos di MEP no ta bay tras di e locura aki y ta laga na e expertonan riba tereno di energia haci nan analisisnan bon planifica pa WEB y cual compania lo sa di tuma e decisionnan corecto, bon structura y bon balansa. Pues e gobierno actual lo no perhudica henter un pueblo manera cu Mike de Meza y AVP a haci na 2015. Ironia di bida ta cu partido AVP kier pretende di tin e miho expertonan riba tereno di energia y tabata e mesun expertonan aki a conseha pa hedge y pueblo finalmente a ser perhudica pa un suma di mas di 280 miyon florin. Sin duda cu Mike de Meza lo bay den historia pa cu e batacaso di hedging ya cu segun su persona e prijs di crudo lo a yega te 500 dollar pa bari. Un locura total!