Dia 3 di october a cuminsa e siman den e ana aki unda cu nos ta enfoca conscientisacion riba dislexia. Un desorden cu por tin un impacto sumamente grandi den e bida di cualquier cu por tin esaki. E ta sumamente importante pa nos tur por tin conscientisacion y conocemento tocante e desorden aki, pa asina nos por brinda un sosten mas amplio y comprensivo na esunnan den nos comunidad cu por tin esaki.
Kico ta dyslexia?
E definicion di dyslexia segun World Health Organization ta cu dislexia ta un desorden specifico pa cu lesamento. E ta un desorden persistente den e adkisicon di lenguahe skirbi cu ta caracterisa pa gran dificultad den e adquisición y automatización di e mecanismo necesario pa por eherce e funcionnan di skirbi, lesa of spel.
Pa pone esaki den terminonan mas simpel, dyslexia ta un dificultad of deficit den e habilidad pa lesa. Personanan cu dislexia usualmente tin dificultad pa lesa cu fluides. Hopi biaha nan ta lesa poco poco y por comete erornan ora di lesa. Esaki por tin un impacto tambe riba nan habilidad di lesa y compronde kico nan ta lesando. Sinembargo, ora cu otro persona lesa pa nan, nan no tin ningun dificultad pa por compronde e texto of loke nan ta tende.
Dyslexia tambe por causa dificultad den otro actividadnan manera;
Comprension ora di lesa
Spelling
Skirbimento
Matematica
Estudionan a mustra cu dyslexia ta conecta na un problema den e vision di e persona afecta. E letterman cu un persona cu dislexia ta mira ta bruha of e por ta completamente pa robes. E ta importante pa ta consciente cu aunke dislexia ta dura henter bida e no ta cronico. Esaki ta relaciona cu e cerebro su funcion, cual ta haci cu no por cambia esaki. No tin cura milagroso tampoco. Pa motibo aki, pashentnan cu dyslexia mester mantene e desorden aki den nan bida y sina biba cu esaki.
Ken ta mas afecta pa dyslexia?
Dyslexia por tuma luga den muchanan di tur nivel di inteligencia. Hopi biaha tabata kere cu e ta afecta mucha homber mas cu mucha muhe, sinembargo estudionan a comproba cu esaki no ta berdad.
E ta importante pa sa cu dyslexia ta presente den henter mundo. E no ta conoce barera cultural, linguistico ni tampoco socio-economico. Tambe tin varios estudio cu ta sugeri cu dislexia ta hereditario. E ta un condicion neurobiologico cu un origen genetico. Esaki ta nifica cu e por ta presente den otro miembronan di e famia, hopi biaha den e mayornan.
Diferente tipo di dyslexia
Tin diferente tipo di dyslexia. E desorden aki ta varia for di un individuo na otro y personanan por tin sintoma di varios tipo di dyslexia of tin e mesun tipo di dyslexia cu diferente sintoma.
Phonological Dyslexia
Esaki ta e tipo di dyslexia mas comun den mucha. E ta caracterisa pa e dificultad den pone palabranan na otro y pronuncia esaki. Muchanan cu dislesa tin dificultad pa haya e letterman y pone nan den orden pa crea zonidonan. Esaki ta crea confusion audible y visual pa e muchanan.
Surface Dyslexia
E tipo di dyslexia aki ta causa cu e mucha no por reconoce palabranan irregular. Mirando cu ta dificil pa memorisa e palabranan aki, e mucha ta comete erornan manera si ta prime biaha el a mira of tende e palabra.
Mixed Dyslexia
Si un mucha tin ambos tipo di dyslexia, e tin dificultad pa decifra letter y reconoce nan visualmente. Esaki por varia den grado.
Dyslexia ta causa dificultadnan duradero na e persona cu tin e desorden aki. Pa e motibo ak ie ta importante pa reconoce e sintomanan pa asina por tuma accion di biaha y haya e ayudo apropia pa e mucha afecta.
