Oficina Central di Estadistica ta presenta e resultadonan principal di e Indice di Prijs di Consumo (CPI) pa luna di Augustus 2022.

Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na Augustus 2022 e prijs promedio pa bari di petroleo (US$ 93.74) a conoce un caida di US$ 9.47 (-9.2%) compara cu Juli 2022 (US$ 103.21).

E kostprijs di electricidad y awa na Aruba ta wordo basa principalmente riba e prijs di Heavy fuel oil (HFO). Pa minimalisa e riesgo di subidanan halto den e prijs di HFO y stabilisa e tarifanan di electricidad y awa durante periodonan prolonga, Water- en Energiebedrijf Aruba N.V. (WEB) a desaroya un strategia di “hedging”. “Hedging” a wordo usa te cu na 2021. Na Juli 2022 a wordo anuncia cu tarifanan nobo di electricidad y awa lo wordo introduci desde Augustus 2022. Consecuentemente, e prijs promedio di electricidad pa vivienda a subi cu 22.7%, di Afl. 240.09 pa Afl. 294.56 y tabata tin un efecto di 1.59 ppt, mientras cu e prijs promedio di awa pa vivienda a subi cu 22.4% di Afl. 137.05 pa Afl. 167.75 y tabata tin un efecto di 0.79 ppt riba e CPI di Augustus.

Prijs di gasolin a registra un caida di Afl. 42.50 cent (-12.7%) na Augustus 2022 y a causa un efecto di -0.84 ppt riba e CPI. Prijs di diesel a registra un caida di Afl. 34.20 cent (-10.9%) na Augustus 2022 y a causa un efecto di -0.05 ppt riba e CPI.

Na Augustus 2022, utilidad, gasolin y diesel como grupo, tabata tin un subida di prijs di 8.4% compara cu Juli 2022 y hunto tabata tin un influencia di 1.49 ppt riba e CPI, mientras cu e restante 404 bienes y servicio hunto, a conoce un subida di prijs di 0.5% y tabata tin efecto un efecto di 0.40 ppt riba e CPI.

Cambio di prijs di Cuminda y servicio di catering na Augustus 2022

E indice di “Cuminda & servicio di catering” a registra un subida di 1.4% na Augustus 2022, despues di un subida di 0.7% na Juli 2022. E indice di “Cuminda na cas” (1.6%) a registra un subida, unda dies (10) di e diesun (11) indicenan di e gruponan di cuminda na cas a subi na Augustus 2022. E indice di “Berdura” a conoce e subida di mas grandi (5.8%) na Augustus 2022. Otro subidanan significante a wordo registra den e indicenan di “Pisca y otro cuminda di lama” (2.2%), “Carni” (1.9%), “Fruta” (1.8%), “Lechi, keshi y webo” (1.4%) y “Sucu, jam y otro tipo di cos dushi” (1.4%).

E indice di “Batata, yuca y batata dushi” (-4.6%) a registra e unico caida na Augustus 2022.

Den e ultimo diesdos (12) lunanan e indice di “Cuminda & servicio di catering” a subi cu 10.3%. E indice di “Cuminda na cas” a conoce un subida di 12.1%, unda tur e diesun (11) indicenan di e gruponan di cuminda na cas a subi durante e ultimo aña. E indice di “Azeta y otro productonan traha di vet” a subi cu 16.8%, e subida di mas grandi entre e gruponan di cuminda na cas. Otro subidanan significante a wordo registra den e indicenan di “Fruta” (16.4%), “Carni” (16.2%), “Lechi, keshi y webo” (12.7%), “Pisca y otro cuminda di lama” (12.4%) “Berdura” (11.7%) y “Batata, yuca y batata dushi” (9.0%).

E indice di “Cuminda pafo di cas” a subi cu 0.8% na Augustus 2022 y a registra un subida di 6.1% den e ultimo diesdos (12) lunanan.

Na Augustus 2022, “Cuminda na cas” y “Cuminda pafo di cas” como grupo, tawata tin un subida di prijs di 1.4% compara cu Juli 2022 y hunto tawata tin un influencia di 0.22 ppt riba e CPI, mientras cu e restante bienes y servicio hunto a experencia un subida di prijs di 2.0% y tawata tin un efecto di 1.67 ppt riba e CPI.