Bureau City Inspector cu yamada na comunidad pa no laga autonan bieu riba caminda publico

E situacion di auto bieunan riba caminda publico tin basta tempo den comunidad unda cu Bureau City Inspector a cuminsa un accion di esaki na San Nicolas algun luna pasa pero e no a keda completamente cla, manera PR di e departamento aki, Robby Rosel a informa.

Esaki ta debi cu nan a muda nan oficina y cu na e momentonan aki nan ta cla pa cuminsa cu e operacion ey dialuna venidero 10 di october unda nan lo sigui de e bario di Savaneta caminda e funcionarionan ayera caba a bay inspecciona e autonan bieu, pa por papia cu e doñonan di e autonan aki pa asina ey, entre dialuna cu diamars nan lo sali conhuntamente cu Cuerpo Policial y tres takelwagen cu ta bay ta na caminda pa por kita e autonan aki riba caminda publico.

“E autonan bieunan, guacharaca ta bay wordo kita y nan ta bay wordo hiba pa Dalta”, Rosel a bisa.

Un otro motibo di pakico nan no por a continua cu e operacion aki ta pa via di e candela cu a wordo registra na Dalta simannan pasa y cu aworaki nan a cuminsa funciona back trahando for di dialuna te cu diahuebs.

Nan ta pidi comprension pa motibo cu poco a poco nan ta bayendo den diferente barionan di e comunidad di Aruba y si algun persona tin informacion di autonan cu no ta den uso mas por yama Bureau City Inspector na 582.9777.

Despues di Savaneta nan ta bay na e bario di Santa Cruz, Paradera y Piedra Plat pa despues lo sigui pa Dakota y Oranjestad, parti di Madiki y Tanki Lendert pa yega te districto di Noord.

Mirando cu nan ta traha cu Cuerpo Policial, Rosel a informa pa comunidad sigui coopera y mantene Aruba limpi cu aworaki e isla ta den un temporada di fin di aña cu nan kier habri un aña nobo cu un Aruba sin sushi y bunita.

“Si algun ciudadano tin un auto cu no ta sirbi mas, cu tin wiel kibra of cu no tin bentana, no lag’e riba caminda publico, simplemente hink’e den bo cura di cas pasobra e no por keda riba caminda publico y cuerpo policial lo duna bo un boet”, Rosel a sigura.

Igualmente el a pidi pa personanan mantene nan cura di cas limpi ya cu temporada di yobida ta trece cune hopi sangura, pa ora di corta matanan no tir’e pafo di e cura, “ora nan ta haci nan casnan limpi nan ta gusta tira sushedadnan pafo di cura di cas, p’esey ban mantene esaki limpi y evita di yama e sanguranan aki” Rosel a finalisa.