Meteorologo David E. Barkmeyer a emiti un alerta pa cu e mal tempo cu ta spera for di dia 6 di october te cu dia 8 di october.
Segun e alerta emiti, ta spera periodonan cu awasero di varios intensidad for di mainta trempan riba dia 6 di october, te cu diasabra dia 8 di october. Esaki ta spera na Aruba y cercania debi cu un ola tropical activo lo crusa den nos region bayendo direccion west.
Sea cu e sistema aki desaroya of no, e lo trece un chens halto pa awasero modera te cu pisa localmente, cual lo por trece cantidadnan di 25 te cu 45mm durante e periodo aki. Tambe ta spera bientonan di 50 te cu 60km den rafaga, specialmente den awasero modera te cu pisa unda cu tambe lo tin lamper y strena. E awasero modera te cu pisa aki lo por causa molester den cierto partinan di e isla.
Condicionnan Maritimo
Pa cu e condicionnan maritimo, e alerta ta dicta cu lama lo por bira bruto te cu bastante bruto, y esaki principalmente den e partinan oost te noordwest di costa, ademas di un lama agita temporalmente na parti zuid y partinan protege.
Conhuntamente cu e alerta aki ta duna un aviso na botonan chikito cu lo drenta den vigor 6or di mainta riba diahuebs 6 di october, cual ta specialmente pa partinan oost te noordwest di costa y tambe pa lama habri.
Na operadornan di boto chikito ta bay un advertencia pa no aventura cerca di e areanan unda cu tin awasero of lamper cu strena.
Ta hopi importante pa tene cuenta cu e alertanan, mirando cu segun e meteorologo sea cu tin desaroyo of no, ta spera awasero di 25 te cu 45 mm. Tambe mester corda cu e aviso pa motonan chikito ta drenta den vigor 6or di mainta riba diahuebs, y ta specialmente pa partinan oost te noordwest ademas di lama habri.
E proximo actualisacion lo ser emiti pa 9or di mainta of antes si condicionnan ta pidi esaki.
