Diahuebs anochi a tuma luga na Boulevard Events Aruba, e presentacion di e poster y e buki di informacion pa cuido y proteccion di baby, na lidernan di centronan di cuido.
Aruba ta conta cu e Plataforma “Platform Veiligheid in de Kinderopvang”, cu ta encarga pa crea un ambiente mas sigur di conscientisacion y prevencion den e centronan di cuido di mucha pa tur e babynan di 6 siman pa 12 luna. E Plataforma aki ta wordo presidi door di señora Noemi Maduro. Señora Noemi manera conoci, a pasa den un situacion na unda cu el a perde baby Noah. Prome Minister Evelyn Wever-Croes na e ocasion aki a representa Minister Rocco Tjon na e evento.
E poster di conscientisacion aki ta encera 10 punto di conscientisacion y e buki ta contene informacionnan cu por yuda centronan di cuido di mucha pa ta mas efectivo den cuido di nos muchanan. Esaki ta un bunita iniciativa di Noemi Maduro y e Plataforma. Centronan di cuido hopi biaha kizas no ta ekipa cu tur informacion actualisa. Pa e motibo aki, fundacionnan, institutonan y e Plataforma aki cu ta cla pa yuda y duna un man pa haci centronan di cuido sigur y duna trankilidad na mayornan.
“Nos muchanan mas chikito merece di ta den un ambiente sigur. Y ta responsabilidad di cada ciudadano pa crea e ambiente aki pa nan. Esaki ta e compromiso tambe di Gabinete Wever-Croes II”, Prome Minsiter a enfatisa.
Actualmente, e proyecto pa centronan di cuido ta den pleno ehecucion. Lo envolve stakeholders concerni y e centronan di cuido di muchanan mes tambe. Esaki ta un trayecto hopi largo y hopi diverso. Lo enfoca riba partinan educativo y infrastructural. Fundacion pa nos Muchanan tin un rol sumamente imlortante den e parti educativo. E introduccion di esaki lo bay den fase teniendo cuenta cu e situacion specifico di cada centro di cuido di mucha.
Prome Minister ta gradici e Plataforma pa nan esfuerso y trabou pa eleva e siguridad pa nos muchanan den centronan di cuido.
