Minister Plenipotenciario Ady Thijsen a informa tocante algun punto importante cu a wordo trata durante di e reunion di Conseho di Minister di Reino (RMR) cu a tuma luga recientemente. E temanan cu a trata ta acerca di decisionnan cu a tuma den cuadro di Aruba su deficit di 2022 y con lo sigui padilanti. Minister Thijsen a indica cu e tabata un bon reunion.
Reunion Conseho di Reino (RMR)
Un di e puntonan cu a trata tabata e deficit di 2022 unda cu CAFT a duna su “aanbeveling” / recomendacion y Secretario di Estado Alexandra van Huffelen a pidi pa wanta esaki. Motibo di esaki ta, pasobra tin un diferencia entre con Aruba y Hulanda ta yega na e sumanan (cua manera di calcula ta uza). Staatssecretaris van Huffelen ta positivo cu Aruba y Hulanda lo sali afo.
Minister Thijsen a indica cu durante e reunion nan a reconoce cu tin un diferencia, y pues a tuma e decision pa wak esaki miho un biaha mas pa asina no keda den e impase.
Un otro punto cu a wordo treci dilanti ta cu e pandemia ta bayendo pero cu mester por tin espacio den caso cu e pandemia lanta cabes of si bin desaster natural.
Den cuadro di esaki nan a trece den nan puntonan dilanti cu nan ta sali for di e punto di bista cu tur cos ta bay sigui bon y e pandemia no ta bin bek. Consecuentemente pa 2023 lo aplica e normanan normal bek.
Minister Thijsen a sigui splica cu den e LAFT di Aruba y RFT di Corsou y Sint Maarten, ta poni articulonan (articulo 23 pa Aruba) cu por desvia a base di e articulonan aki den caso cu bin un ‘ramp’. Considerando esaki Minister Thijsen a bisa cu el a enfatisa cu semper mester tene esaki na cuenta cu por haci uzo di e articulonan aki pasobra no por premira locual lo pasa den futuro. Pues ta spera cu di berdad tur cos ta bay bon y cu nada mas manera e pandemia tuma luga, pero cu ta reconoce cu tin e espacio pa uza e articulo menciona, den caso cu mester, cual nan a bay di acuerdo cu ne.
