Luna di october ta bay tuma luga e ta spera siman di bisti cinta cora. Fundacion Anti Droga Aruba (FADA) pa mas cu 25 aña caba ta forma parti di e accion aki, y nan a conta cu esaki a cuminsa door di famianan di DEA – Agencia Anti-Droga di Merca – cu tabata investiga casonan di droga, traficacion ilicito, entre otro.

Rulienne Arends, trahado preventivo di FADA a splica cu despues di cuater aña cu DEA tabata bin investigando di manera ‘undercover’, un di e agentenan a wordo gara y asesina. Su famia a bin cu un forma pa por recorda e persona aki cu a haci hopi esfuerso pa e lucha contra adiccion, y aki su amistadnan y famia a cuminsa usa loke ta e cinta cora, loke a cuminsa crece y bira mas grandi den transcurso di añanan y a expande na otro paisnan.

FADA a uni na esaki pa mas di binticinco aña caba unda nan tambe tin nan cinta cora y den conexion cu esaki. FADA ta di dies aña cu ta bin organisando e famoso siman di bisti na locura, esunnan cu ta organisa e siman di cinta cora ta scoge un lema y diferente scolnan ta participa pa saca un lema ganado. E aña aki e lema ta “Celebrate Life, Live Drug Free”.

Igualmente, Arends a splica cu hopi scol hunto cu docente y muchanan ta participa den esaki, caminda den transcurso di añanan famianan y companianan tambe ta bin forma parti di esaki. Tempo cu pandemia di Covid-19 a yega na Aruba, nan no tabata sigur con e campaña aki lo a bay cana, pero hopi famia a participa den dje y cu cada aña e actividad ta birando mas grandi.

“Si e muchanan ta compronde dicon nan ta forma parti di e siman di bisti na locura, nos tin cu bisa cu algun aña atras FADA a haci henter un actividad y nos a entrega esaki na scolnan basico. Docentenan a haya un buki kico e siman di bisti na locura ta y kico siman di cinta cora ta pa nan splica esey na e muchanan”, Arends a señala.

Hopi mucha ta compronde pakico nan ta bisti un mea colorido of nan mag di bay bisti na scol na pidjama, y tiki tiki, mayoria di persona y mucha – cu ta nan enfoke – ta compronde dicon nan ta forma parti di e siman aki.

Di su parti, Miosotis Tromp cu tambe ta trahado social di FADA a expresa cu pa simannan caba nan ta bin mirando cu hopi interes e siman di cinta cora, pero tambe e siman di bisti na locura. E fechanan di e actividad aki ta bay cuminsa dia 24 di october te cu 28 october. Ta bay cuminsa cu e prome dia pa bisti un articulo color cora; dia 25 por bisti na pidjama of un costume di bo heroe faborito; 26 di october nan ta bay riba e tema cu ta e uso di meanan di colornan; 27 di october ta e dia cu tin oportunidad pa haci algo creativo cu cabey; y ultimo dia 28 di october, mirando cu nan ta celebra 10 aña, cualkier participante por crea un lema creativo y positivo cu ta bay utilisa pa e siguiente aña.

Personanan interesa di participa den actividad aki, por subi riba e website www.fada.aw unda lo haya e banner di cinta cora, click riba dje y yena e formulario y despues ta subi e potretnan pa asina ey participa.

Door di Covid-19 e dos ultimo aña nan no por a ofrece premionan pero e aña aki segun Tromp mes a sigura, nan ta bay celebra den grandi cu comunidad ya cu e meta ta pa conscientisa mundo pero tambe mustra e sosten di manera creativo y diferente.

Nan ta bay duna diferente premionan na participantenan di varios categoria, “si bo ta sinti cu bo kier forma parti di e siman di bisti na locura, un dia so mes ta haci un diferencia, nos ta keda super contento y si tin pregunta por tuma contacto cu nos”, Tromp a bisa.

E actividad ta habri pa tur persona cu kier participa cu lo mustra di ta hopi creativo.