Michi ta un pushi di caya, di chikito e ta bin cas pa busca cuminda, awa pa bebe y sosega curpa. Recientemente tabatin anuncio for di trempan tocante un tormenta tropical cu lo pasa cerca di Aruba y e lo trece hopi awa. E anochi cu e tormenta lo pasa, Michi no a bin cas henter dia y aparentemente anochi tampoco.
E tin custumber ultimamente di drumi riba e pida muraya cu ta dun’e bista riba ken ta drenta of sali di cas. E ta kere niun hende ta ripar’e, pero manera un auto pasa, e luz di auto ta haci cu un silueta di batman mustra riba e muraya. Nos ta hay’e masha pret mes, manera nos baha for di e auto e ta baha di e muraya bin cuminda nos.
E anochi aki m’a bay wak si e tabata descansa riba e pida muraya, pero e no tabata eynan tampoco. Ma pensa cu probablemente e la haya lugar pa keda.
Awasero a cuminsa cay y berdad e awasero no a cay duro, pero si henter anochi. Si no tabata pa e buraconan den e dak di cas mi lo a drumi hopi mas dushi. M’a lanta banda di 4or pa haci un inspeccion di e tobonan y weanan cu nos tin rond buta den cas pa haci nan bashi y si mester pasa mop. Masha hopi awa a cay ya cu tur cos tabata bao di awa.
Manera ma habri e porta di patras pa saca e awa, ata pober Michi tur muha y aparentemente hopi rabia tambe pasobra el a grita mi dos biaha prome cu el a drenta, sacudi su patanan drentando e porta y bolbe grita mi un biaha mas prome cu el a cuminsa na seca su mes cu su lenga. Mi ta sigur cu su ultimo grito si por a traduciele lo a bisa “How dare you?” M’a dun’e un serbete cu mi no ta usa mas y el a cay drumi riba dje te mainta.
Ainda e mainta e tabata bon rabia nos a hayele na su spot faborito, pero e cara ta bisa otro, manera no bin cerca mi of keda leu. Nos a logra si di saca un potret di dje na e momento ey.
Comparti bo storia cu Bon Dia Aruba!
Bo tin un storia dibertido di bo mascota (of cualkier animal)? Comparti esaki door di e-mail noticia@bondia.com
