Post Aruba lo reuni cu tur partidonan envolvi y gobierno pa purba bini na solucion

Manera conoci, tin un situacion tenso y fastioso andando na Post Aruba N.V. recientemente relaciona cu empleadonan y gerencia cu no a bini na otro pa loke ta CAO nobo, y sin kier of por cumpli cu esun bieu.

E empleadonan a bay varios biaha den manifestacion recientemente mirando cu nan a bay atras cu 105 florin y ta esey nan ta bezig ta bringa. Lo tin un reunion cu minister y tur partido envolvi pa purba bini na un solucion.

Mediador di Gobierno, Anselmo Pontilius ta splica cu Post Aruba tin varios siman caba na mesa ya cu tin dos parti: for di ultimo dos aña tin e discusion riba e parti di CAO di aplicacion di aumento general cada Januari. Post, manera hopi otro empresa, a pasa y ta pasando den basta dificultad ultimo tempo na momento cu empleadonan mester a entrega parti di nan condicionnan di trabao, y 5% directo di nan salario. Mescos cu empleado publico, e trahado di post tambe a haya den su salario back e 5%, ainda tin entrega riba vakantie uitkering y bonus. E discusion ta cu si e trahado tin cu haya un aumento di CAO cu a vence caba, tur Januari manera a bin ta hay’e.

Tin cu resolve e situacion aki pasobra ta un punto serio di discusion ariba mesa, e trahadonan ta reclamando un derecho segun nan CAO cu a caduca caba. Esey ta un punto cu den reunion programa pa awe, den partidonan envolvi hunto cu minister lo mira con lo por sali for di dje segun mediador.

Tin 82 trahado, y Post manera hopi compania a haya nan cu cambionan brutal den cual parti di nan servicio y den sector priva a wordo asumi, tambe tin keho, di propio gobierno cu ta accionista 100%, a percura parti di e bolo a bay pa otro companianan priva. Post den su totalidad a perde un cantidad di entrada pa entre otro servicionan cu nan tabata duna anto awor no ta existi mas. E analisis ey ta mustra ta con bo por transforma Post, den ki tipo di servicio pa publico cu e ta genera y gana placa.

Gobierno te awor ta subsidia un suma anual, y logico segun Sr. Pontilius, e analisis ta bira cua ta e servicionan principal ainda cu ta sigur clave pa e publico, pero tambe con bo ta cambia e compania di tal forma cu ta keda competitivo y por keda carga e peso di 82 trahado. “E parti importante aworaki ta, con bo ta cuida e cuponan di trabao cu t’ey, y percura pa tin un claridad pa e trahadonan y pa nos tur, ta ki futuro e compania aki lo tin.”