Minister di Asuntonan Economico, Comunicacion y Desaroyo Sostenibel, mr. Geoffrey Wever, a reuni awe cu e team di Vestiging di DEZHI den cuadro di e maneho nobo di permiso pa negoshi cu lo drenta na vigor entrante 1 october 2022, e asina yama “Vestigingsbeleid”.
“E team di Vestiging di Departamento di Asuntonan Economico, Comercio y Industria ta frontliners den e desaroyo economico di Aruba y mi ta contento di wak cu nan ta cla pa cuminsa ehecuta e maneho nobo”, Minister Wever ta comenta.
Siman pasa Minister Wever a anuncia e modernisacion completo di e maneho di permiso pa negoshi. E meta di e modernisacion di e maneho pa permiso di negoshi ta pa: elimina “red-tape”, stimula mas negoshi pa habri na Aruba y asina crece Aruba su economia y crea inversion, cuponan di trabou nobo, spin-off economico y aumento di entrada pa caha di gobierno.
E cambionan principal den e Vestigingsbeleid 2022 ta: reduccion di “red-tape”, digitalisacion completo, ampliacion di categoria di persona cu no mester pidi un permiso mas, stimula inversion den centro di Oranjestad y San Nicolas, stimula diversificacion di Aruba su economia a traves di e “six promising sectors”, duna companianan chikito posibilidad pa establece den nan cas (zona residencial) y introduci pa prome biaha principionan di sostenibilidad den e maneho.
Riba website di DEZHI: www.deaci.aw/category/news/ tin mas informacion over e Vestigingsbeleid nobo.
“Tur cos ta in place pa cuminsa cu ehecucion di e maneho nobo di permiso di negoshi!” Minister Geoffrey Wever a expresa.
