Secretario di Estado Hulandes pa Asilo, Eric van der Burg a haci un bishita na Corsou y Aruba pa evalua con nan ta anda cu solicitantenan di asilo y otro migrantenan. Pero e critica a keda si e tin algo pa busca na e islanan, mientras cu na Hulanda e situacion di asilo a bay for di man.
“Mi mester ta reserva, si mi haya algo”, Van den Burg a comenta, segun un articulo di periodista Sharina Henriquez pa e portal online Caribisch Netwerk. “Pasobra prome mi mester sigura cu, como Secretario di Estado, mi tin tur cos den orden na Hulanda.”
Pero e no tabata completamente reserva na momento di papia tocante e fluho enorme di Venezolano cu pa varios aña ta huy na e islanan. “Corsou y Aruba tine berdaderamente pisa, ta mi conclusion principal. Si bo mira e cantidad di persona for di Venezuela cu tin na Aruba actualmente, y bo traduci esaki na Hulanda; e ora nos lo mester ricibi na Hulanda casi dos miyon di persona”, el a comenta.”Awo, na Hulanda nos tin dificultad caba pa ricibi e 130mil persona cu a yega for di Ucrania y resto di mundo.”
Segun e relato di Caribisch Netwerk, organisacionnan di ayudo ta calcula cu na Aruba tin actualmente entre 15mil y 20mil persona indocumenta. Nan momento di yegada nan por solicita asilo y no ta wordo deteni manera ta e caso na Corsou. Pero no tin recepcion regla, mientras esaki ta necesario segun tratadonan internacional pa refugiado y solicitante di asilo.
Tin un lista largo di espera, di 1,700 solicitante di Asilo cu Aruba ta procesa cu un grupo di trahadornan IND di Hulanda. E capacidad pa haci algo no ta suficiente; e siman aki, Aruba a pidi Van der Burg pa mas personal IND.
E secretario di estado ta comenta cu tin un gran diferencia entre e trato di solicitud di asilo: Aruba ta rechasa 98 porciento mientras Hulanda ta acepta 70 porciento. “E ta un situacion opuesto aki”, Van den Burg a bisa. “Na momento cu mester deporta nan, nan ta pidi asilo y door cu 98 porciento ta wordo rechasa, mayoria di nan ta bay den ilegalidad. Na Hulanda bo ta pidi asilo y bo ta haya esaki den 70 porciento di e casonan, y si bo no hay’e, e ora ey bo ta bay den ilegalidad.”
Como motibo, gobierno di Aruba a bisa cu mayoria di solicitante ta migrante economico for di Venezuela. Y pobresa no ta un motibo valido pa ricibi asilo. Pero cu e experiencia di solicitantenan di asilo for di otro paisnan, e secretario di estado ta haya cu acepta 2 porciento ta “abnormalmente abao” y kier profundisa mas riba esaki.
Potret di Caribisch Netwerk.
