Openbare Avondleergangen Aruba (OAA) ta habri inscripcion

Ayera mainta minister di Enseñansa y Deporte, Endy Croes a ofrece un conferencia di prensa pa trece dilanti informacion tocante OAA cu a cuminsa back oficialmente cu nan opleidingnan e luna aki y Leer Werk Traject cu ta bay cuminsa na october.

Manera a bira conoci, Openbare Avondleergangen Aruba (OAA) a cuminsa den september unda cu Carlos Martinez persona encarga pa habri OAA e aña aki a indica cu nan a cuminsa cu e proyecto na juni y na mita di september nan a realisa un reunion pa tur alumno cu e ultimo tres añanan no tabatin chens di caba cu nan studio pa via di pandemia, cambio di directie of otro motibonan, esey a haci cu nan mester a papia cu e alumnonan aki pa nan caba nan studio.

Di esaki, nan a haya entre 40 pa 45 ex-participante unda cu OAA a categorisa nan y aworaki ta bezig hincando un programa den otro pa tur di nan tin chens di caba cu nan diplomanan.

Dialuna ultimo 26 di september a tuma luga un reunion cu e grupo di docentenan pa informa nan di kico ta e plan nobo di OOA cu segun Martinez a sigura, ta bay cuminsa cu un concepto nobo unda nan ta usando e-Learning cu ta digitalisa y unda cu e alumno por haci cinco modulo pa siman caminda e opleiding tin rond di 30 modulo, a base di esey e alumno ta determina con e ta bay caba su studio.

Di e parti practico, el a sigura cu esey si no por bay mas lihe pa motibo cu nan tin cu haci’e pero pa un persona cu tin añanan di experiencia e ta pasa den dje hopi mas facil.

Ademas, el a informa cu nan ta bay start cu dos opleiding, un di elektromonteur y koelmonteur cu ta bay ta dos opleiding personalisa unda cada studiante tin su mesun trayectorio den cual algun di nan por cab’e den seis luna y otro den ocho luna.

“Nos meta ta pa zorg pa e alumno caba cu su opleiding lo mas lihe posibel pa por contribui na e mercado laboral”, el a bisa.

Martinez a afirma cu nan a haci bishitanan na e companianan di koeltechniek y elektro y cu nan ta buscando hende pa traha, “kiermen cu tur hende cu lo caba cu e opleidingnan nan lo duna trabou, mi ta casi sigur, den tur e entrevistanan cu nos tabatin ta mustra cu nos tin un tekort grandi di trahado na Aruba y nos ta sumamente contento di cuminsa cu e opleiding aki pasobra e ta pa tres aña”.

E opleidingnan aki ta cuminsa cu nivel dos cu segun Martinez a splica e ta un tiki mas halto of ekivalente na EPB cu ta cambiando nan sistema “ y otro aña nos kier sigui cu nivel tres cu e mesun alumnonan cu ta bay caba nivel dos”

ROVC di Hulanda lo ta na Aruba den proximo dianan pa duna guia na docentenan y pa nan purba di acredita e negoshinan cu tambe tur hende cu ta caba e opleiding ta bay haya un carnet pa tur hende por ta certifica pa traha cu airco na Aruba. E carnet ey ta nifica cu e persona ta califica pa haci e trabou ey, pa lo cual Martinez a bisa cu nan kier pa otro opleidingnan por haya e mesun carnet aki den futuro.

“Cu tur hende na Aruba tin un certificacion pa nan por demostra cu nan tambe por” Martinez a declara.

Asina mes, el a bisa cu na januari nan ta bay cuminsa cu dos of tres mas opleiding unda cu for di e dianan aki nan ta bay cuminsa tene encuentronan cu negoshinan pa puntra nan kico nan kier wak y nan kier pa por trece esey dilanti. “Nos no ta bay bin cu opleiding pa opleiding sino cu a base di e demanda nos ta bay hacie”, Martinez a señala.

Tambe, el a bisa cu stagiaire pa esaki semper ta keda un reto pero nan ta purba di convence e negoshinan pa nan wak con importante ta pone stagiaire back.

Ademas, nan ta bay tin e Leer Werk Traject (LWT) pa lo cual Shinuska Albertus coordinador di esaki, a expresa cu ta dirigi pa hobennan di 17 pa 25 aña di edad cu pa un of otro motibo nan no a logra caba nan studio secundario, pa cu esaki, ta wordo brinda un otro oportunidad na nan cu tres diferente aspecto como educativo, unda e hoben ta bay scol 3 biaha pa siman ubica na EPB Hato den oranan di atardi.

“E opleidingnan cu nos ta ofrece ta conocemento basico di mantencion y conocemento basico di beyesa”, Albertus a sigura.

Aparte di aspecto educativo, nan ta bay core stagiaire den companianan apunta pa esaki y lo tuma luga e otro dos dianan di e siman durante 8 ora pa dia.

Pa finalisa, el a splica el aspecto social unda e hobennan aki ta haya guia den grupo pero tambe individual, Albertus a enfatisa cu e acogida pa e Leer Werk Traject ta hopi grandi y nan aplicacion a cuminsa caba unda por haya informacion riba e website www.oaa.aw y lesnan ta plania pa cuminsa dia 10 di october 2022.