(LaPatilla/Argus) – Petrozamora, un proyecto petrolero di ‘joint venture’ di Pdvsa cu e empresa Ruso Gazprombank, awor a bira un subsidiario 100% propiedad di Pdvsa, asina a bisa e trahadornan di Pdvsa recientemente.
Empresanan Ruso manera Rosneft y Lukoil un tempo tabata socio regular di Pdvsa den varios proyecto, pero a cuminza retira di nan tempo cu Estadonan Uni a cuminza impone sancion riba Pdvsa y e empresanan cu ta haci negoshi cune. Na 2020 Rusia a crea Roszarubezhneft pa tuma encargo di e negoshi Venezolano di Rosneft, pero gradualmente a cuminza sali di e relacionan cu Pdvsa.
Den un serie di mensahe a bisa e trahadornan di Pdvsa cu nan mester mantene secreto encuanto di e salida di e Rusonan di e proyecto Petrozamora o lo core riesgo di haya sancion. Roszarubezhneft ainda ta asocia cu Pdvsa den un campo di gas natural den estado Monagas, na parti oriental di Venezuela.
Erick Perez, candidato pa sucede Asdrubal Chavez pa dirigi Pdvsa, awor ta presidente di Petrozamora. Julio Castillo lo ta e gerente general, mientras cu Mariebert Jimenez lo ta e subgerente.
Petrozamora ta ubica na estado Zulia, cuna di industria petrolero Venezolano, di cual e produccion den ultimo decadanan a keda baha y actualmente ta na menos di 100.000 bari pa dia (bpd), compara cu 150.000 bpd ainda na inicio di 2022. Solamente alrededor di 1.500 di mas di 7.500 pos den e region ainda ta produciendo, segun un fuente di Pdvsa. E volumen cada vez mas grandi di awa den e produccion y falta di fondo pa drecha e posnan ta ser menciona como motibo principal di menos produccion.
E reduccion di e produccion di e parti occidental ta obligando Pdvsa pa confia mas riba produccion den Faha di Orinoco, di petroleo ultrapisa cu no por bay mercado sin pasa den un proceso costoso di mehoracion, bahando rentabilidad.
