En conexion cu Dia Mundial di Turismo diamars 27 di september, Prome Minister Evelyn Wever-Croes den su mensahe durante e ceremonia na Plaza Juancho Yrausquin, a pone enfasis riba personanan cu tawata pilar pa e industria turistico na Aruba, na Minister di Turismo Dangui Oduber y tambe na tur trahado riba nos isla cu ta traha pa engrandece nos turismo.
“Awe mainta, un trahado for di San Nicolas, un otro for di Savaneta, Santa Crus, Playa, Noord y cada distrito di Aruba, a lanta trempan mainta pa bay traha den un di nos hotelnan. Na Aeropuerto un rato pasa, e prome di mas di 20 vuelo diario a yega, pa trece bishitantenan pa pasa nan vacacion. Nos taxistanan tey para pafo, cla pa transporta nan cu cordialidad y nos companianan di Tours y Car Rental lo hiba nan keiro rond, of huur nan auto bon laba. Un empresario di Watersport lo habri su facilidad pa brinda nos bishitantenan servicionan espectacular pa landa y recrea den nos lama.
Awe nochi nos trahadonan di Restaurant y Casino, nos Musiconan, Artistanan y Artesanonan lo tey pa eherce nan trabao, ofrece nan talento cu dedicacion y cordialidad. Tur esaki a bira nos Industria Turistico”, Prome Minister a remarca.
Nos Industria Turistico a cuminsa cu e vision di un lider pa wak nos turismo bira un pilar economico fuerte y a laga construi Aruba su prome hotel grandi; Aruba Caribbean Hotel. Despues di esaki, turistanan for di Merca, Europa y demas parti di mundo pa bin pasa nan vacacion na nos isla. Despues un otro lider pionero den e industria turistico, Señor Ike Cohen kende despues di segunda segunda guera mundial, no solamente a haci Aruba su hogar, sino a traha duro pa cumpra su prome Hotel y inverti den otro hotel y companianan, dunando oportunidad pa crea cuponan di trabou pa hopi ciudadano di nos pais. Tambe Aruba a conoce mas pionero den turismo cu awe ainda ta cu nos. entre otro señor Michael Kuiperi, señor Rori Arends y señor Harold Malmberg.
“Danki na cada un di boso pa boso aporte na nos turismo. Danki na Minister Oduber pa su maneho pa recuperacion. Pero no por laga afo, esnan cu dia den dia fo ta traha duro cu animo y determinacion pa asina nos turismo haya forsa bek despues cu e pandemia a causa hopi daño na nos industria turistico. Danki na nan esfuerso, nos turismo ta lentando bek.
Ora cu cada un di nos sali pa trabao mainta, nos cada un por tin un sentido di gratitud pa e fundeshi di nan vision y dedicacion a laga pa nos. Y danki na esnan cu a traha y ta trahando den e industria di turismo y awe ta sirbi nos como ehempel y inspiracion pa enfrenta tur dificultad pa vence y logra progreso y bienestar pa nos pais Aruba.
