Ayera mainta den un conferencia di prensa, presidente nobo di aña 2022 y 2023, Luzina de Greef a informa cu Quota International of Aruba ta bezig ta organisa nan fundraising Picnic Dansant pa e luna di november.

Manera ta conoci, siman pasa nan a finalisa e siman di ‘Kibra Silencio’. De Greef a sigura cu esey a bay cu hopi exito, unda cu e lista di FEPOH y The Specialist tabatin mas di shen hende cu a registra pa esaki. Nan como organisado a keda hopi contento cu e comunidad di Aruba ta conscientisando nan mes pa cuida oido.

Ivi Simon, vice-presidente di FEPOH a expresa cu Quota International of Aruba a keda dos aña trankil sin realisa actividadnan, y aworaki cu hopi entusiasmo nan ta anuncia nan Picnic Dansant, cu manera el a sigura, hopi hende tabata warda pa e evento aki.

Picnic Dansant lo tuma luga dia 27 di november na Renaissance Conference Center, un diadomingo merdia for di 2or te cu 5or di atardi. Simon a bisa cu e aña aki e tema ta “Back to the 80’s”. Hopi ta e hobennan cu ta puntra kico tin pa e dia aki, unda el a enfatisa cu comunidad tin cu prepara e outfit pa e dia ey, cu mester ta alucinante.

Pa yena di musica y ritmo e evento aki, el a declara cu e banda “Azucar” ta bay ta presente. Simon a menciona cu tambe ta bay tin cuminda y tur loke nan lo recauda e dia ey ta bay back na comunidad cu mester di un ayudo.

Ademas, el a bisa cu Quota e ultimo añanan nan a yega di recauda hasta 100.000 florin di recaudacion, pero debi na circunstancianan e sumanan a bin bahando hasta 40.000 florin. “Nos kier yega back sikiera un 50.000 florin di recaudacion pa otro aña”, el a bisa.

Den temporada di Covid-19, FEPOH a detecta cu e demanda pa cuido di oido na Aruba a bira mas importante, maske nan no sa si esey tabata pa motibo cu hende a keda cera den cas hopi tempo debi na e medidanan implementa pa pandemia of pa otro motibonan cu nan no ta conoce.

Loke ta importante ta cu nan a bin hayando, specialmente na scolnan, muchanan cu no ta scucha manera cu e mester ta. P’esey mester sigui trece dilanti informacion tocante con pa cuida oido, ya cu na momento cu un hende ta perde oido, no ta hay’e mas y e persona mes no ta ripara cu esey ta disminui poco a poco. Pa e motibo ey ta hopi importante pa check oido y ta recomenda por ehemplo, pa no haci uso di headphone cu volumen mucho halto.

Tambe a informa cu normalmente den temporada di carnaval tin campaña pa cuida oido, pero hende no ta mas consciente na momento di realisa cu tin zonido duro durante resto di aña, por ehemplo, na fin di aña cu tin e pagara. Algun personanan ta para cerca y no ta ripara cu esey ta mesun duro cu un trailer di carnaval, esey tambe por daña e oido.

Igualmente, el a sigura cu tur zonido duro ta hopi dañino pa oido y ta p’esey cu Quota International of Aruba ta boga pa e hendenan ta consciente di esaki y pa preveni un daño irevocabel.

El a splica cu zonido duro ta por ehempel, aparatonan di trabou, den construccion of industria, imprenta, fabrica y mas, pa e motibo aki hopi di e luganan aki tin medidanan di seguridad (safety measurments).

For di edadnan jong mester cuminsa cuida e dos oido, asina como tambe sigui e recomendacionnan y no somete e oido na zonidonan mucho intenso. Di e forma ey por evita problemanan auditivo y infeccion cu ta wordo considera como e di dos causa di perdida di oido.

Un di e recomendacion ta pa reduci e cantidad di aparato cu zonido cu ta funciona na mesun tempo y purba tene nan semper na un volumen adecua. No scucha musica durante mas di un ora pa dia cu headphones y mantene nan na un volumen abou di 60%. Usa proteccion si ta traha cu zonido. Seca e dos oido hopi bon despues di baña na e ora di bay pool, asina ta evita cu awa lo drenta y causa un infeccion.

Pa mas informacion por tuma contacto cu Quota International of Aruba.