Jaap van Dissel di OMT no a ricibi ningun fondo secreto na Aruba

Jaap van Dissel, Presidente di Outbreak Management Team, OMT no a ricibi 750 mil euro for di Stichting Open Nederland y como tal no ta berdad cu 400 mil euro a bin Aruba, manera cu empresarionan derechista Yves Gijrath y Erik de Vlieger a bisa na comienso di September.

E noticia aki a lanta hopi conmocion na Hulanda y tambe na Aruba. Mescos cu na Hulanda, tabatin hopi pregunta con Van Dissel, kende ta na cabez di e ekipo cu tabata guia e maneho di e pandemia di coronavirus na Aruba tambe, por a haya fondonan adicional y secreto for di e fundacion cu tabata organisa testnan di coronavirus pa Ministerio di Salud, Bienestar y Deporte di Hulanda.

E informe aki a sigui declaracionnan fuerte di parti di miembro di Forum voor Democratie (FvD) Gideon van Meijeren, kende na mei a acusa e infectologo di corupcion (red. FvD ta contra e maneho cu OMT a hiba pa combati e pandemia, particularmente tabata contra e uso di tapaboca y vacuna).

Gijrath y De Vlieger a bisa cu nan tambe tabata haci investigacion di corupcion pa hopi tempo pero cu tabata falta prueba y pa e dosnan, e cuenta di banco cu a cay den nan man tabata locual nan tabata warda riba dje. Riba e cuenta bancario tabata skirbi cu Van Dissel a ricibi 750 mil euro di SON pa medio di un cuenta di Rabobank na Belgica y cu riba e mesun dia a pasa 400 mil pa un cuenta na Aruba. Gijrath a bisa cu e tabata 99 porciento sigur cu e recibo bancario tabata real. Sinembargo siman pasa a resulta cu esey no tabata e caso. Personanan riba e red social Twitter a mustra riba e diferente erornan den texto cu ta ilustra cu e recibo no tabata autentico, entre otro e adres di e banco y erornan den e calculacionnan. RIVM a demanda un retraccion y a ricibi esaki tambe.

Pero tabata fraccion Groep van Haga, lidera pa ex-miembro di FvD, Wybrand van Haga cu a manda un serie di pregunta pa Minister di Salud, Bienestar y Deporte (VWS) di Hulanda, Ernst Kuipers riba e supuesto pago. E Minister a dicidi pa contesta, basa tambe riba peticion di Van Meijeren y otro Parlamentario Hulandes pa un reaccion por escrito riba e acusacionnan di corupcion di parti e Presidente di OMT.

“Aunke mi ta haya importante pa duna contesta na miembronan di Tweede Kamer, mester bisa cu e cantidad y frecuencia di e preguntanan di miembro di Van Haga ta asina hopi cu nan ta tuma hopi tempo di ambtenaarnan di mi ministerio. Riba dje mi ta haya preocupante cu den formulacion di e preguntanan ta bin cu suposicionnan no substancia riba personanan individual y cu ta haci uso di fuentenan cu tampoco tin prueba. Ta parce cu aki ta duna poco responsabilisacion na efectonan negativo di declaracionnan difamatorio, particularmente riba e esfera di biba personal di esnan envolvi. Mi no ta haya esaki na su luga,” Ernst Kuipers a bisa.

E Minister a informa e fraccion cu e tabata na altura di e informacion cu Stichting Open Nederland lo a haci un pago di 750 mil euro na Jaap van Dissel, pa medio di un transaccion riba un cuenta di banco na Belgica. E Minister a bisa mesora cu e no a mira ningun prueba confiable cu esaki berdad a sucede. Pa colmo, esnan cu a bin cu e informacion a hala esaki aden y a pidi despensa na Jaap van Dissel despues di e peticion di RIBM pa rectificacion publico pa e informenan infunda aki.

“No tin motibo pa haci ningun investigacion. Ademas, e ta hopi preocupante cu no ta tene cuenta cu e efectonan di un informacion infunda asina riba esnan envolvi, cu netamente ta esnan cu durante ultimo añanan a dedica nan mes pa bringa e pandemia.”

E otro pregunta di Van Haga ta si por publica tur documentacion financiero y interaccion cu SON, mirando cu e fundacion entre otro ta brinda servicio na Ministerio VWS. Riba esaki Kuipers a bisa cu responsabilisacion ta tuma luga segun e procedura regular. “Ta a base di e proceso aki lo duna Tweede Kamer miho bista di y riba e responsabilisacion financiero.”

Tambe a puntra e Minister pakico SON tin un cuenta bancario na Belgica, y a puntra e Minister si e tabata sa di esaki prome cu e publicacion y si ta asina, pakico a usa e cuenta y no a scoge pa un cuenta di banco Hulandes. E Minister a bisa cu ya caba e medio cu a saca e informacion aki a pidi dispensa pa noticia infunda y no tin contesta riba e supuesto cuenta di banco na Belgica.

Riba e pregunta di unda e fondonan riba cuenta di SON ta bin, e contesta di Kuipers tabata cu SON ta traha riba instruccion di Ministerio VWS. E Ministerio tin bista riba e administracion financiero di SON, tanten cu e ta cuadra denter e control y responsabilisacion den cuadro di e trabap. Pero Ministerio VWS nunca a haci pago na SON pa medio di e cuenta bancario na Belgica.

Un di e preguntanan tabata e envolvimento di Sr. Van Dissel den e trabaonan di SON y si el a duna instruccion of a haci trabao pa e fundacion durante e periodo di corona. Aki e contesta tabata simple. Sr. Jaap van Dissel no a haci ningun trabao pa SON.

E preguntanan a sigui ta hopi sugestivo, unda a puntra e Minister si e ta bay investiga e pago na van Dissel y si ta berdad cu van Dissel hunto cu Minister pa Asuntonan di Exterior Wopke Hoekstra a purba haci un cuenta na Anguilla na 2020 y si a papia cu e dos personanan riba esaki. E contesta riba tur tres tabata simplemente cu e noticia ta eroneo y cu a pidi despensa caba pa difundi esaki.

 

 

.