Ayera tabata un dia special pa Aruba caminda a conmemora e Dia Mundial di Turismo na instalacionnan di Ballroom di Hotel Marriot unda diferente mandatario, stakeholder y expertonan internacional den area di Turismo a reuni riba e tema scogi pa e aña aki, cu ta “Rethinking Tourism”, esta reconsiderando turismo.
Minister di Turismo y Salud, Dangui Oduber tabata presente y a señala cu ayera tabata un dia special pa Aruba, alabes un momento pa reflexiona y para keto riba e importancia cu turismo tin den e bida diario, economia, cultura, finansa publico, progreso y bienestar di pais Aruba.
Pa e motibo aki, tur aña Ministerio di Turismo conhuntamente cu Aruba Tourism Authority (ATA) ta celebra e dia aki. E tema scogi pa e aña aki ta “Rethinking Tourism”. Manera ta conoci, despues di pandemia di Covid-19, tur hende mester a pensa con por reinventa turismo y ki strategia cu tin cu bay usa pa recupera e turismo cu a sufri hopi den aña 2020 y 2021 pa via di e pandemia.
Awe despues di mas di dos aña, minister Oduber a sigura cu nan ta hopi satisfecho con turismo a recupera y nan ta bin proyectando cu aña 2022 ta bay recupera 100% di turismo, a pesar cu luna di januari y februari ultimo a habri hopi slow pa motibo di variante Omicron. Pero Aruba a recupera hopi lihe y aworaki ta e di dos pais na mundo cu a recupera su turismo di e forma aki den comparacion cu 2019.
“P’esey awe nos ta gradici na nos partners pero tambe nos kier gradici na cada un di e persona aki cu ta labora den industria di Turismo, pasobra nan ta e asset di mas grandi cu nos tin como pais, pasobra nan ta atende cu nos huespednan diariamente”, el a sigura.
Tambe tabatin como invitadonan studiantenan di Unidad di Hospitalidad y Turismo di EPI y Facultad di Turismo di Universidad di Aruba cu a asisti pa diferente sesion di charla cu expertonan den Turismo, unda nan a comparti nan experiencianan con nan ta rethinking tourism. Pero pa minister Oduber manera el a sigura, ta importante pa por tin un desaroyo sostenibel teniendo en cuenta cu flora y fauna, medio ambiente y pa garantisa cu den futuro cercano tin e cuponan di trabao pa e yiunan di tera y profesionalnan cu ta siguiendo educacion na EPI y Universidad di Aruba tin un carera tambe den e industria.
E siman aki ta bay tin diferente presentacion y conferencia tumando luga cu un grupo diverso di expertonan di Aruba, pero tambe internacional. Tin diferente hende cu a bin for di Europa pa asisti e “Aruba Meets Europe Conference”, unda cu minister Oduber a comenta cu tur e tour operators tin un tarea importante pa por yuda Aruba mercadea den Europa pa trece turistanan for di e continente ey. Na e conferencia aki lo tin oportunidad pa intercambia idea y tambe pa siña for di vision y strategia di otro paisnan.
Di su parti, Ronella Croes CEO di ATA a expresa cu e ta sinti su mes hopi satisfecho y cu esaki ta un momento pa refleha no solamente riba e pandemia den ultimo añanan y loke nan a logra “pasobra esey ta yena bo cu hopi orguyo, principalmente cu pa e ocasion aki ATA a pone tur cos den un linea di tempo y tur e logronan ey ta pone bo bay back na cuanto cos a wordo haci”, Croes a bisa.
Tambe ayera e dia a cuminsa cu reflexion dedicando tempo na dos icono cu a pone fundeshi pa turismo di Aruba den caso aki Juancho Irausquin pero tambe como ATA nan a papia di futuro y kico tin pa spera, unda cu el a destaca e socionan di Europa presente den e “Aruba Meets Europe Conference” . Ademas tabatin e simposio denomina Cruise Symposium Aruba 2022 e cual ta un programa anual cu nan ta organisa y cu a tuma luga ayera tambe cu e meta pa hunto traha riba e calidad di servicio y productonan cu ya ta existi caba y cu ainda por wordo ofreci na e bishitantenan.
Tisa LaSorte CEO di Aruba Hotel And Tourism Association (AHATA) tambe tabata presente den e conferencia aki y a splica cu nan a pone enfasis riba e tema di “Rethinking Tourism” pa asina ey corda cu mester sigura cu e exito di turismo tin su efectonan positivo tambe riba henter e pais, esey kiermen cu mester tin efecto positivo riba e hendenan, con ta proteha e naturalesa y cu e industria mes ta sostenibel.
“E palabra sostenibilidad kiermen varios cos, e ta sostenibel den sentido cu tin un futuro positivo pero tambe ta sostenibel den sentido cu nos ta keda proteha nos pais y proteha nos naturalesa, esey ta e enfasis di e dia di awe”. LaSorte a expresa.
Igualmente el a sigura cu Aruba a demostra cu durante y despues di e pandemia cu ta un isla hopi resiliente den turismo, “nos tin un producto hopi fuerte, e hendenan kier bin Aruba y esey ta yuda nos, claro e ta keda den nos economia y e ta importante pa hende realisa cu no ta solamente e cliente cu ta traha den turismo ta beneficia di turismo, tur hende na Aruba y otro companianan cu ta existi ta e motibo di con nos tin un economia fuerte cu ta productivo y ta crea mas trabou, p’esey turismo ta keda importante”, el a sigura.
Tocante e retonan cu nan tin na e momentonan aki, segun LaSorte a destaca ta cu mester sigura cu e producto ta keda como un producto fresco y nobo pa motibo cu pandemia a keda atras pero esey kiermen cu otro paisnan tambe a habri back no Aruba so y esey ta nifica cu tin mas competencia y mester ta sigur pa tin incentivo pa duna un bon calidad di producto y un bon calidad di servicio.
