(LaPatilla) – Gobierno di Venezuela ta tratando di recupera turismo, cu den ultimo añanan a keda reduci severamente, cu e crisis economico y politico, y crisis di Covid-19. Un di e lugarnan turistico mas conoci ta Parque Nacional Canaima, den parti oriental di e pais, famoso na henter mundo. Aborda un ‘curiara’ (embarcacion di remo indigena) pa haci un excursion pa Auyantepuy pa observa e imponente Salto Angel ta algo cu hopi hende tin riba nan agenda.
Parque Nacional Canaima ta ricibi cada vez mas biahero, entre nan regularmente hende conoci di mundo di farandula, entre otro.
Mientras cu actividad turistico ta recupera, esaki naturalmente ta algo cu solamente esnan mas privilegia na e pais mes por afford, banda di e turistanan stranhero cu ta paga mas pa yega ey cu nan lo ta pagando pa bay otro destino turistico den region. Ta calcula cu alrededor di 10% di e pais mes por tin e recursonan, despues di e recuperacion parcial di ultimo aña, pa por disfruta di e tipo di vacacion aki den nan propio pais.
Paquete turistico cu prijsnan entre $650 y $1.100 ta inunda rednan social, mientras e ciudadano promedio ta observa solamente. Un biahe pa Cancun ta sali $500 y Punta Cana ta ofreci na $380.
E salario promedio di un trahador di sector priva ta alcanza apenas $126 pa luna, segun cifra di Observatorio Venezolano di Finanzas (OVF) te augustus 2022. Si considera sector publico, e cifra ta cay te aproximadamente $21 pa luna.
Pa paga e paquete mas barata pa Canaima, un empleado di sector priva mester traha 154 dia laboral (7 luna) y dedica tur e salario na e biahe. e empleado publico mester traha 928 dia laboral, como 40 luna, pa logra esey.
