Como presidente di CARICOM, presidente Surnameño, Chandrikapersad Santokhi ta bay sostene e negociacionnan cu mester conduci na e miembresia asocia den CARICOM pa Aruba, Corsou y Sint Maarten. E hefe di estado a comparti esaki durante un reunion entre e prome ministernan di Aruba, Evelyn Wever-Croes; di Corsou, Gilmar ‘Pik’ Pisas; y di Sint Maarten, Silveria Jacobs diahuebs ultimo, dia 22 di september.
Esaki a keda reporta den corant Surnameño, Waterkant.
Anteriormente e aña aki, Caricom a dicidi pa continua cu e proceso di negociacion tocante e solicitudnan pa miembresia asocia di e tres islanan di Reino Hulandes. Presidente Santokhi a compromete su mes, como presidente incumbente, pa duna completo sosten pa inicia e negociacionnan en cuestion lo mas pronto posible.
E hefe di estado ta enfoca riba cooperacion pa laga su mes wordo scucha den foronan internacional.
“Nos mester alcansa e futuro cu nos ta desea mediante solucionnan global.”
E presidente ta caracterisa mayor control y mercadonan mas grandi como algun di e beneficionan di solucionnan global pa Aruba, Corsou y Sint Maarten. A duna como ehemplo cu e sector di turismo en particular por wordo stimula mediante cooperacion cu Caribe. Esaki lo rekeri pa mehora conexionnan aereo y via lama. Ademas, Caribe y Surnam en particular por ta un bon partner den suministro di cuminda pa e tres islanan.
E prome ministernan y e presidente tambe a discuti e laso special cu e islanan tin cu Surnam.
Tin varios acuerdo cu ta forma un bon base pa mas colaboracion. A keda acorda cu e hefenan di estado ta bay cera acuerdonan di ‘follow-up’ riba esaki.
