Diasabra ultimo na Compleho Deportivo Betico Croes a tuma luga e “Expo di Salud Hunto Contra Malesanan Cronico” unda profesionalnan den area di salud a uni pa asina por duna recomendacion y tips pa personanan hiba un bida mas saludabel.

Cu presencia di diferente mandatario y parlamentario, e Expo di Salud Hunto Contra Malesanan Cronico a cuminsa for di 10or di mainta. Minister di Salud y Turismo, Sr. Dangui Oduber a expresa cu despues di dos aña a bira posibel pa organisa e conferencia aki, ya cu ta un exposicion cu tabata programa na aña 2020 caba y cu debi na pandemia di Covid-19, mester a pospone su realisacion.

“E expo aki, “Hunto Contra Malesanan Cronico” ta hopi importante den cuadro di nos plan nacional di prevencion. Awe sigur nos tabata hopi contento cu nos por a conta cu presencia di Gobernador interino Sr. Agustin Vrolijk y tambe presidente suplente di parlamento, Raymond Kamperveen, pa asina demostra nan sosten y tambe e confiansa den Plan Nacional di Prevencion”, minister Oduber a señala.

E plan aki a wordo introduci na aña 2020 caba y na e momentonan aki nan ta bezig cu implementacion. E mandatario a señala cu Aruba su comunidad no ta esun di mas saludabel y cu hopi ta esnan cu ta sufri di malesanan cronico, cu ta pone cu hopi hende ta fayece tur aña pa motibo di e malesanan aki. E enfoke special di e exposicion aki ta pa “brinda un plataforma na tur e fundacionnan cu ta traha pa yuda combati tur e malesanan cronico, pa ofrece nan servicio y tambe chekeo medico gratis e dia di awe, [algo] cu ta hopi importante pa cuida bo salud”, minister Oduber a sigura.

Chekeonan di sucu, colesterol, presion, entre otronan a wordo haci. E publico presente a haya informacion di kico tur hende uni mester haci pa tin un comunidad mas saludabel. A brinda tambe diferente opcionnan saludabel pa come, como por ehemplo pastechi, kroket of bolo, pero sin sucu, sin salo y di un forma mas natural.

“Ami a haya hopi interesante con nos ta transformando, cu cada biaha tin mas comerciantenan chikito cu ta kere den un comunidad mas saludabel den e estilo di bida cu nos ta desea, pasobra na final di dia ora bo mehora bo salud y cambia bo estilo di bida, esaki ta bay mehora bo calidad di bida y e ta bay extende bo bida”, Oduber a bisa.

Di loke ta trata AZV, minister Oduber a trece dilanti cu pa añanan largo, AZV semper tabata enfoca riba e parti curativo. Ultimo añanan nan a mira mas e parti preventivo, sinembargo, den prevencion por ta cu no lo mira e resultado di biaha sino cu ta tuma tempo pa wak e resultadonan den e cifranan. Aworaki nan ta bay comparti cu comunidad e lansamento di e Aruba Healthy Lifestyle Center, cu ta un proyecto cu financia door di AZV pa prome biaha den historia. E intencion ta pa yuda tur esnan cu tin problema cu obesidad, pa guia nan, coach nan, brinda nan un menu unda nan tur dia por haci uso di dje pa cambia y adapta nan estilo di bida, pa haci intervencion y asina evita cu e hendenan aki por bira diabetico of pashent di dialyse, ya cu hopi di nan ta termina den hospital unda cu tambe nan por muri.

“AZV y ministerio di Salud ta sostene e iniciativanan aki pa nos shift di e parti curativo pa preventivo, pasobra nos ta convenci cu hunto cu e plataforma di salud y e fundacionnan, nos ta bay logra tin un comunidad mas saludabel”, minister Oduber a declara.

Den e exposicion aki tambe hospital a mustra un mashin di dialyse, unda cu nan ta considera cu esaki ta un bon motibo pa hende cuminsa tuma consciencia pa preveni y pa e otro generacionnan no sufri di malesanan cronico. Door di tin un comunidad bon informa, cu bon hermentnan, por preveni un mal experiencia cu un malesa di e tipo aki.

Te na 2020, 70% di e poblacion na Aruba tabatin sobrepeso y 30% di nan tabata obeso, tur esaki pa motibo cu hende no ta tuma accion pa mehora nan salud, y esey no ta un opcion mas. Minister a comenta cu pa e motibo aki, a pone disponible e programa aki pa conscientisa y tuma accion pa e salud di e comunidad ta mas saludabel.