Un challenge nobo ta bin tumando forsa y ta parce na otronan cu a surgi den pasado, loke por ocasiona riesgo pa e salud di esunnan cu ta purba haci’e solamente pa drenta den e “trending”.

Food and Drugs Administration di Merca (FDA) a bati alarma tocante esaki par di dianan pasa unda cu un challenge nobo ta stimula e hobennan pa haci un supuesto receta di cushina cu ta inclui galiña y un remedi pa tosamento.

Di acuerdo cu e agencia Mericano, e remedi pa tosamento ta wordo bendi di manera liber sin un receta di un dokter, y por ta causando un preocupacion pa su consumo inapropia “cu por presenta riesgonan significativo si ta wordo usa di forma incorecto of si ta abusa di su consumo”.

E challenge nobo aki ta consisti di “cushina” un pecho di galiña y drech’e cu remedi di tosamento conoci como “NyQuil of un otro remedi parecido, e cual ta contene paracetamol, dextromethorphan (DXM) y doxylamine. Ambos mester wordo poni den un wea hasta cu e galiña lo cushina y keda cla pa come. Sinembargo, FDA ta indica cu e receta, ademas di no ta mucho “dushi” pa come, e por ta dañino pa e salud y no sigur pa motibo cu ora e remedi ta wordo herbi e por ta mas concentra y ta cambia su propiedadnan di otro forma, incluso si e galiña no ta wordo consumi, ora ta hole e bapor di e remedi mientras e ta wordo cushina por causa cu e nivelnan halto di e remedi ta drenta den e curpa.

Aunke e remedi ta sirbi pa yuda cu e sintomanan di tosamento, ora e ta wordo cushina por tin un efecto contrario, kiermen, e por provoca daño den pulmon.

Segun e agencia Mericano, e challenge aki ta wordo publica y comparti riba rednan social y “ta basa den pone presion riba e compañeronan di klas pa haci’e”, na mesun manera cu ta stimula usuarionan di e red pa nan tambe haci’e.

“E challenge aki di video, cu pa hopi biaha ta wordo dirigi na e hobennan, por causa daño den e persona y incluso hasta por causa su morto”, segun FDA a adverti tocante loke el challenge aki.

Aunke e challenge aki ta aumentando na Merca, ta trata di un tendencia den un red social cu ta wordo usa pa miyones usuario rond di mundo y ta existi riesgo cu na otro paisnan por cuminsa haci esaki. Mester destaca cu e challenge aki no ta algo nobo, un di nan tabata e Ice Buket Challenge.

Tambe, e agencia a señala tocante un otro challenge cu ta involucra un remedi pa alergia cu a cual ta busca genera “alucinacion” , lo cual a causa un alerta ya cu tambe por genera dañonan pa salud y hasta e morto di e persona.

Di e forma aki, autoridad ta recomenda pa no consumi remedinan den exceso, aunke nan por wordo bendi sin receta di dokter.

Aunke Tik Tok a tuma medidanan necesario caba y a block e frase “NyQuil Chicken” na algun paisnan pa asina ey evita cu usuarionan por busk’e y haya e videonan peligroso aki. No tin registro ainda di personanan cu a dicidi di come e galiña cu e remedi.

Con por preveni e dañonan pa via di “NyQuil Chicken”? e mesun organisacion FDA a duna algun recomendacionnan cu mayornan por tuma den consideracion e challenge aki y proteha nan yiu.

Pa e motibo ey, mester mantene e remedinan den un luga cu e posibel victimanan no por hay’e, papia cu muchanan y hobennan tocante e peligernan cu e tipo di challenge aki por causa, tambe mester ta consciente di e riesgo cu ta implica haci challenge di rednan social.

Ademas, agencia tambe a enfatisa cu remedinan semper mester wordo utilisa bao supervision di un dokter y cu si ta wordo consumi e dosis robes por causa e morto di e persona, e mesun boter di remedi ta trece cune diferente specificacion como por ehemplo ken mester consumi e remedi y con tin cu us’e.

Ta importante pa trece dilanti cu te ainda e challenge aki no ta mucho conoci na Aruba pero debi cu den epoca aki hopi muchanan y hobennan tin un telefon celular nan tin acceso na tur red social incluyendo Tik Tok cu ta esun mas usa.

Ta p’esey cu Bon Dia Aruba ta trece e topico aki dilanti como un articulo informativo pa asina ey comunidad y specialmente mayornan keda alerta tocante loke e muchanan y hobennan ta haci riba rednan social, e challenge aki tambe por bira un trending na Aruba y manera a wordo splica, por trece consecuencianan hasta fatal pa esunnan cu lo por haci e challenge di Sleepy Chicken cu pa mayoria di biaha por ta door di influencia di e mesun compañeronan di scol.