Vereniging van Werknemers met een Individueel Arbeidsovereenkomst in dienst van de WEB Aruba N.V. (sindicato VWI) a yama un conferencia di prensa ayera mainta pa trece dilanti algun punto di preocupacion pa loke ta trata e futuro di produccion di coriente na Aruba.

Richard Frank, presidente di e sindicato a expresa cu manera comunidad por a mira algun dia pasa, Anthony Rojer, director di Utilities Aruba N.V. a informa riba e “Expresion of Interest” cu tin riba e construccion di molinanan di biento na e area di Rincon. Nan ta considera cu Rojer no ta trece full historia dilanti manera cu e ta.

Pa e motibo aki, nan a pensa cu ta importante pa yama un conferencia di prensa y asina conta e parti di historia cu no ta wordo bisa den su totalidad pa pueblo di Aruba. Frank a menciona cu nan tin puntonan di preocupacion di cual e prome ta cu “Utilities Aruba N.V. ta actuando den violacion di su meta stipula di su statuutnan y tambe ehecutando actonan pa cual tambe no tin vergunning pa haci”, el a bisa.

Di esaki, Frank e presenta un copia di statuutnan di Utilities Aruba N.V. cu nan metanan y tambe un copia di e ministeriële beschikking di pa kico nan tin vergunning y pa kico no. Utilities Aruba N.V. su metanan den su statuut no ta encera e actonan cu nan ta haciendo aworaki y tampoco e vergunning cu nan tin ta permiti esaki, di acuerdo cu e copia di e ministeriële beschikking.

“Sr. Rojer semper ta papia di un Utilities Group. Un Utilities Group no ta existi, loke si ta existi ta e Utilities Aruba N.V., WEB Aruba N.V. y N.V. Elmar. Esey ta entidadnan legal cu ta existi y no ta existi tal cos manera un Utilities Group”, Frank a expresa.

Igualmente, el a trece dilanti cu Utilities su intencion tabata na comienso di aña 90 ta cu den e renobacion di WEB a traha e constelacion di Utilities, WEB y Elmar hustamente pa Utilities forma un buffer entre politica y companianan nobo estatal cu tabatin eynan.

“Lastimamente den e ultimo 15 aña e rolnan parce cu el a bira contrario, caminda Utilities na luga di tene e distancia politico, ta juist trece politica den tur e companianan estatal di WEB”, Frank a sigura.

E “Expresion of Interest” di e parke di molinanan di biento na Rincon ta mustra di ta e comienso di un ehecucion di un rapport cu Utilities Aruba N.V. a duna tarea na e compania cu ta yama Project Consult Global S.A. Frank a señala di e rapport aki cu “tur nos miembronan cu ta profesionalnan cu ta trahando añanan caba na WEB pa e parti di reunion cu Eagle LNG y e parti aki, nos no ta sostene e rapport aki, unda cu Utilities Aruba N.V. no a pone e rapport aki publicamente. Atrobe tin un Non Disclosure Agreement (acuerdo di secresia) y p’esey den e rueda di prensa aki nos no lo bay den detaye riba e rapport aki, pasobra e ta cay bao Non Disclosure Agreement”, el a expresa.

El a enfatisa cu e rapport aki ta un envergadura masha masha grandi mes pa henter e futuro energetico di Aruba y cu e rapport aki “ta hopi amateur hinca den otro. E ta incompleto y e ta a base di suposicionnan cu ta eroneo”, Frank a manifesta.

Di loke ta trata e di dos punto cu nan a trece dilanti, e trabaonan di e compania Project Consult Global S.A cu a traha cu autorisacion di Utilities Aruba N.V., nan a sigura cu e rapport aki tin un falta di credibilidad total su tras. Na februari di aña 2020 Utilities Aruba N.V. a duna tarea pa haci un auditoria tecnico door di un blackout cu a tuma luga na 2019, locual Frank a sigura cu nan no tin problema cune y nan a encomenda e conseho di supervision di WEB pa nan por keda al tanto di e auditoria tecnico aki.

E auditoria aki a wordo conduci door di un compania cu ta yama Global Utilities Consultance, un compania Panameño cu tabatin un grupo di cuatro integrante. “E cuater cabayero aki, tur ta Venezolano, nan ta residencia na Panama y na ta wordo contrata freelance door di Global Utilities Consultance pa bin haci e technical audit na WEB cu e fecha di februari 2020 pa maart 2020.”

El a splica cu durante pandemia nan a sigui nan trabao, no na Aruba pero si via online. Di esey a bin resulta cu nan a manda e rapport aki pa e profesionalnan na WEB haci un review, “algo cu no a impresiona nos, ban pone asina. Y nos haya e oportunidad di wak dos biaha e rapport aki, pero e rapport final mes nunca nos a wak ni haya un copia di dje y e rapport aki a caba rond di juli 2020”, Frank a afirma.

Na final di 2020 y 2021 Utilities Aruba N.V. a contrata e compania Project Consult Global S.A estableci na Panama pa bin haci un estudio riba un “supuesto estudio di carbonisacion”, unda cu awor ta bin resulta cu e compania aki a wordo estableci dia 12 di augustus di 2020 net despues cu e auditoria tecnico a of ta terminando na WEB, den cual un di e personanan di e compania Panameño tambe a participa.

Igualmente, Frank a presenta diferente informacion di companianan cu ta relaciona tanto cu Global Utilities Consultance como cu Project Consult Global S.A, cu den nan opinion y investigacion haci, tin hopi discrepancia y falta di transparencia. “Y e hendenan aki ta consehando nos hendenan di Utilities Aruba N.V. pa bini cu un futuro energetico pa Aruba.”

Ademas, el a bisa cu e rapport final presenta pa e dos compania aki no tin ningun referencia, ni calculacion economico riba con nan a yega na nan cifranan y no ta acompaña di ni un modelo unda nan por audita si e informacion duna pa nan ta cuadra, ni tampoco kico ta e posicion cu nan a usa pa yega na e tipo di conclusion cu nan a yega na dje.

“Staf profesional di WEB Aruba cu ta miembro di nos vereniging no ta carga ni sostene e conclusionnan poni den estudionan haci door di Angel Abreu y su compania Project Consult Global S.A den opdrag di Utilities N.V.. E estudio ta duna un impresion grandi cu Abreu y su compania a skirbi loke Utilities Aruba N.V. kier mira poni den e rapport, cu cientificamente racional y na nivel profesional, e rapport aki no ta”, Frank a declara.

Pa finalisa, e informacion cu e grupo di expertonan a haya no a trece e recomendacionnan completo dilanti di loke nan a conclui di e rapport aki como expertonan di WEB, cu despues nan a bin haya e luna aki, unda Frank a sigura cu tin informacion cu a wordo laga afo, cu na final nan a conclui cu esaki ta nada mas cu “manipulacion di informacion”.