E vuelonan di KLM na Aruba, Corsou y Bonaire a sali segun programa. E retrasonan leve cu a resulta na Schiphol por wordo compensa na caminda probablemente. Si tur maleta tambe a logra yega no ta conoci. Den weekend, a laga cantidad di ekipahe atras.
KLM a cancela riba diasabra 34 vuelo cu lo mester a sali for di Schiphol, segun un relato di portal noticiero Aruba.nu. E aerolinea a haci esaki despues di e decision di Schiphol riba diabierna pa permiti alrededor di 9,250 menos pasahero di salida pa motibo di escasez di seguridad durante proximo luna y mey.
Pa awe, e aerolinea ainda tabata evaluando cua vuelonan por a anula. “KLM ta hopi disgusta pa e hecho cu Schiphol a indica apenas riba diabierna cu no por maneha e cantidad di pasaheronan cu ta embarca na Amsterdam riba diasabra, diadomingo y dialuna”, segun un declaracion di e aerolinea. “E solicitud aki ta bin añadi na e cancelacionnan realisa anteriormente, solicita pa september.”
En total, a cancela 52 vuelo di KLM pa diasabra.
Diasabra mainta, TUI ainda no por a duna informacion tocante posible cancelacionnan. Nan tabata wardando pa informacion complementario pa por evalua kico lo ta e posible consecuencianan pa e vuelonan di nan biaheronan. Segun nan vocero, nan a haci preparacionnan pa sigura cu nan biaheronan por a bay cu vakantie, posiblemente saliendo for di e otro aeropuerto. E vuelo OR 383 pa Aruba y Bonaire a sali cu un leve retraso, igual cu OR 351 pa Corsou.
Ta trata aki di vuelonan cu tabata programa entre 9.30am y 5pm. E avionnan a sali si, pero bashi pa busca pasaheronan na e destinacion.
“Esaki tabata un decision dificil, pero asina nos ta cumpli cu e demanda pa limita e pasaheronan di salida, reduci e rijnan di seguridad, permiti pa e biaheronan cu ta bolbe biaha manera custumber, y alivia e presion riba e operacion”, KLM ta skirbi.
Den un declaracion, director operacional di Schihol, Hanne Buis a bisa riba diabierna cu e reduccion di e cantidad di biahero ta necesario pa por garantisa e seguridad di trahador- y pasaheronan. El a yama esaki “mal noticia pa pasaheronan y pa aerolineanan”. E medida a yega un dia despues cu presidente Dick Benschop a anuncia su retiro.
E medida ta na vigor te cu al menos dia 31 di october. E cantidad total di pasaheronan di salida pa dia ta bira e resto di e luna aki 54,500, y pa e siguiente luna 57mil. E cantidadnan aki ta considerablemente menos cu loke Schiphol a calcula na comienso di augustus.
Durante varios luna caba, Schiphol tin problema cu temponan largo di espera pa chekeo di seguridad. Den berano e rijnan tabata pas cortico, entre otro, pasobra e personal a ricibi un bonus di berano. E luna aki e rijnan largo ta back.
Potret di DutchNews.nl.
