No tin ningun detaye ainda y tanten cu esey ta e caso, no por duna aprobacion pa e tubonan pa gas pasa riba tereno di Marinierskazerne Savaneta. Asina Jurjen Abma, Prome Oficial di Marinierskazerne, responsabel pa seguridad, medio ambiente y maneho diario di e facilidadnan di Marinierskazerne Savaneta a bisa Bon Dia Aruba.

“Ta mi responsabilidad pa percura cu tin un ambiente di trabao sigur pa tur hende cu ta traha aki na Kazerne, mescos ta cu mi ta responsabel pa uso debido y corecto di e tereno cu nos a haya pa e Kazerne. Nos ta habitante temporario cu mester percura pa laga e luga atras den bon condicion. Y den sentido aki, nos ta un stakeholder den e proyecto di tuberia di Eagle LNG,” Abma a bisa.

E declaracion aki ta sigui e declaracionnan publico di Eagle LNG cu pronto lo cuminza instala e tubonan di gas for di tereno di refineria te cu WEB. Eagle LNG a bisa cu e tubonan lo pasa riba tereno di Marinierskazerne. Bon Dia Aruba a haci pregunta via nan pagina di FB riba e tema y eynan a admiti cu ainda ta den negociacion. Pero realidad ta cu no tin ningun negociacion andando. Eagle LNG ainda mester produci datonan pa Marinierskazerne.

Comandante di Marinierskazerne, Art van Beekhuizen a bisa Bon Dia Aruba na December, aña pasa, cu tin hopi interogatorio riba con ta bay core e tubonan di gas di tereno di RDA pa WEB, ya cu awor nan pasa den areanan residencial y tambe den Marinierskazerne. Segun e Comandante e tempo ey, na momento cu yega asina leu cu ta determina cu ta usa e mesun trayecto, e lo kier sinta na mesa pa haya sa mas, y duna su punto di bista. “Marinierskazerne Savaneta tin explosivo,” el a comenta. “Como tal ta un luga special (een plek van bijzonderheid).”

Despues di 9 luna, no a bin mucho cambio den e postura di Marinierskazerne, pa e simpel hecho cu no tin informacion nobo. Berdad un ehecutivo di Eagle LNG a introduci su mes na Marinierskazerne na December 2021, pa informa riba e plannan pa e tubonan. “A bin un hende di e compania pa bisa cu lo ta bunita si por sigui e mesun ruta di e tuberia actual.”

Pero manera Comandante Van Beekhuizen a bisa, e tereno di Marinierskazerne tin su funcion militar y ta mantene reglanan estricto di maneho di procesonan. “E tubonan actual ta pasa cerca di e deposito di municion. Nos ta tira riba tereno, ta tene operacionnan cu helicopter. Mi interes ta pa ningun momento crea peliger sin cu mester,” Abma a bisa.

A informa Eagle LNG cu mester sa concretamente kico e compania kier y cua ta e medidanan pa garantisa seguridad. “E prome stap mester ta un rapport riba tipo di gas, tipo di tubo, cua ta e perfil di riesgo, cua elemento ta bay pasa, cua ta e presion. Den otro palabra e ‘specs’ (detayenan). Esey ta permiti cu por midi e riesgonan concretamente segun e analisis di riesgo. Nos ta warda ainda riba esey.”

Tambe kier sa cua norma ta bay aplica, pasobra “nos ta un organisacion Hulandes cu ta opera a base di leynan Hulandes. Eagle LNG ta un compania Mericano. Merca no tin un norma specifico pasobra cada estado, cada municipio ta determina su mesun norma di seguridad. Nos kier e balornan absoluto pa asina por compara cu e normanan cu nos ta mantene nos mes na dje. Eseynan ta informacion cu nos ta wardando riba dje.” Ademas mester midi e riesgo tambe a base di e actividadnan cu ta tuma lugar den e kazerne, cu tambe ta produci un nivel di riesgo. “Por tin varios actividad di riesgo cu ta aumenta e peliger y nos kier haya bista di e riesgo acumulativo. Pa esey nos kier haci e calculacionnan.”

E tereno di Marinierskazerne ta cay formalmente bao maneho di e ‘Rijksvastgoed bedrijf’ na Hulanda cu tin su mesun experto y huristanan kendenan ta esnan cu ta negocia cu DIP of tur otro. Prome Oficial Abma a pidi nan pa mantene contacto cu Eagle LNG pa asina por haya e rapport cu a pidi. Te ainda no a ricibi ningun di e informacion pidi. “Nos a laga un compania Hulandes independiente y nos mesun expertonan den cas, wak kico e perfil di riesgo por ta. Nos tin e rapport ey, pero nos ta warda esun di Eagle LNG pa compara.”

Locual ta yamativo ta cu representantenan di Eagle LNG ta papia comosifuera nan tin autoridad pa instala e infrastructura pa gas. E ingenieronan den e sesionnan publico a bisa e infrastructura ta den un estado hopi avansa, y cu si tin adaptacion lo por haci esaki cu tempo. “Nos ta mira fecha ambicioso den corant, plannan presenta comosifuera nan ta cla caba,” Abma a bisa Bon Dia Aruba. Mescos cu tur hende, Marinierskazerne Aruba ta sigui e desaroyo a base di publicacionnan den medionan di comunicacion. “Cu a traha plannan pa pasa e tubonan pa gas nos a tende di medionan di comunicacion. Ningun hende a informa nos formalmente. No for di Gobierno, no for di Eagle LNG na prome instante. Nos tabata un poco sorprendi, pero ta tuma un actitud di espera. Pero, tanten cu no sa kico ta e detayenan y e riesgo, e tubonan di gas lo no por pasa riba tereno di Marinierskazerne.”

E ehecutivo di Marina Hulandes a bisa cu no mester kere cu ya caba tin un infrastructura pa gas. E tubonan cu tin awor ta dos pa awa, y uno ta pa HFO y un pa coriente. E tubonan actual ta manteni regularmente pa WEB y no ta contene material peligroso manera asbestos, algo cu a controla tambe. “Mantencion di ekipo, sigur si ta trata transportacion di material peligroso, ta crucial pa mi, pa por tin e garantianan. Cu WEB e ta bayendo bon.” Mientras cu presencia di e tuberia existente no ta ideal, e pregunta ta si kier un riesgo adicional. “Ami personalmente ta cauteloso. Mi ta compronde cu tin mas interes. Y si resulta cu e transporte di gas sigur ta posibel, e tubonan lo por bin aki. Pero mi kier sa prome si nan ta sigur.”

Eagle LNG no por haci un yamada riba e infrastructura existente pa por instala su mesun tuberia. “Eagle LNG cu no por apela riba e derecho di uso di pasado di un otro partido. E partido ta nobo, pues ta negociacionnan nobo.”

Abma a bisa cu for di medionan di comunicacion ta compronde cu tin un presion politico pa e proyecto bay door, pa e proceso cuminza. Tin hasta presion for di Consulado Mericano, cu na un forma cauteloso ta pidi pa coopera cu e proyecto. “Pero nos di Kazerne ainda ta sinta den e fase di formacion di e imagen, mescos cu resto di e isla. Nos kier sa di e rapport cu Royal Haskoning ta traha, cua ta e perfil di riesgo tin mara na dje y unicamente despues por bay na e fase di evalua y tuma decision. Nos no ta den e fase ey.”

Te ainda Marinierskazerne no a haya ningun reaccion di Minister Infrastructura, of instancianan DTI, DIP o/y DOW. “Si Gobierno tin interes den e proyecto, mester realisa cu nos mester di tempo y kier sa prome kico ta bay pasa. No por tin decision pura. E decision mester ta integro basa riba hecho y no emocion.”