Tur cos ta cla pa e segundo edicion di e festival di cine di Playa. E aña aki fundacion CINEARUBA a prepara un programa amplio yena cu tayernan, masterclassnan, peliculanan y sesionnan di network. E festival di cine lo tuma luga durante e vacacion escolar di October cuminsando riba Diahuebs 6 di October te cu Diadomingo 9 di October na Ateliers ’89 situa na dominicanessenstraat 34, net schuin tegenover di Maria College Mavo.

Tur e peliculanan cu ta participando e aña aki den Playa Film Festival a pasa door di un evaluacion prome cu nan a bira e seleccion oficial. Un proceso cu a inicia riba 28 di januari di e aña aki pa medio di un ‘film submission’ unda cu a cuminsa ricibi peliculanan for di tur parti di mundo. Riba 15 di augustus e posibilidad pa entrega peliculanan a cera y a pasa pa evalua tur e peliculanan ricibi.

E prome anochi di e festival lo inicia cu e apertura di un exposicion di cine basa riba e trabaonan cinematografico di e cineasta Juan Francisco Pardo kende e aña aki ta cumpli 30 aña como creador di contenido. Bishitantenan lo por experiencia diferente instalacionnan di arte inspira riba e storianan di cada un di e peliculanan di Pardo.

E nochi ta sigui cu e documentario ‘New light – the Rijksmuseum and slavery’ di e cineasta Ida Does, Hulanda. E otro peliculanan cu tambe lo wordo presenta riba e prome anochi ta ‘Rasha’ di Melissa Strangio, Hulanda y ‘The last resource’ di Kaylee Reeberg hunto cu Juan David Villar, Aruba.

Riba e di dos dia di e festival lo inicia cu e masterclass di ‘Script breakdown’ unda cu e participantenan lo siña con pa break down un script den rekisitonan di produccion. Lo sigui cu e masterclass di ‘Production schedule’ cu ta enfoca riba programacion di talentonan, ekipo humano y localidadnan. Atardi lo tin tayernan pa mucha cu ta ‘Foley sound effect’ cu ta siña muchanan di 7 pa 12 aña con ta traha efectonan di zonido pa un pelicula. Un otro tayer pa mucha ta di ‘Play doh stop motion’ aki lo traha un pelicula uzando play doh. E peliculanan pa e di dos dia ta ‘You and what army’ di Jim Menza, USA, ‘Dande di Aruba’ di Cindy Kerseborn, Aruba, ‘Why we are unhappy in cities’ di Zhao Gang, China, ‘Beyond marks’ di Leticia Lopez, Brazil, ‘Donna’ di Sonia Commandeur, Hulanda, ‘Online Crush’ di Ronney Dotel, Aruba.

Riba e di tres dia lo tin ‘Film language’ masterclass cu ta ofrece un bista riba e nombernan tecnico y e nificacion di cada imagen of escena den pelicula. Pardo lo bay conduci un masterclass unda e lo combersa riba e formula di cine cu e ta uza pa wanta e costonan abao.

Pa e muchanan lo tin un ‘Green screen acting’ tayer unda cu e muchanan lo explora y actua dilanti un green screen. E peliculanan pa e di tres dia ta ‘Opal’ di Alan Bidard, Martinique, ‘Malpelo mountain of shark’ di Kevin Mannens, USA, ‘The greatest of all Tina’ di Brody Gusar, USA, ‘The sands of time’ di James Hughes, UK, ‘Perspektiva’ di Rovendley Welvaart, Curacao.

Riba e ultimo dia di e festival lo tin repiticionan di diferente masterclassnan, tayernan y peliculanan. E anochi di diadomingo nuebe di october lo anuncia e ganador di pelicula cortico y pelicula largo premio publico. E publico ta esun responsabel pa vota pa nan peliculanan faborito pa asina por selecciona e peliculanan ganador di e festival di cine di Playa.

Ticketnan ta obtenibel online via www.playafilmfestival.com y tur ticket ta fungi como un ‘day-ticket’ cu ta duna e publico acceso riba tur e actividadnan durante henter e dia riba e dia cu nan cumpra e ticket. E contribucion di e publico pa medio di cumpra un ticket lo yuda fundacion CINEARUBA cu tur otro proyectonan cu ta enfoca riba desaroyo artistico y personal di muchanan y hobennan.

Den un lokaal lo tin actividadnan pa mucha mientras cu den otro lokaal tin peliculanan unda cu mayornan por bay wak. Pues e mayornan por bay wak e peliculanan mientras cu e muchanan ta participa den e diferente tayernan. A haci un combinacion di diferente actividad, y a tuma sugerencia di e publico di aña pasa pa ripiti e actividadnan. Ta bay tin ripiticion di actividadnan pa asina por bini participa na e otronan cu kisas no por a bin e dia anterior.

Juan Francisco Pardo: “Mi ta invita comunidad completo pa bin dia 6 di October pa 8’or di anochi, te cu Diadomingo 9 di October. Esaki ta un bon iniciativa pa mayornan bishita cu nan yiunan, muchanan y hobennan bishita.”

Playa Film Festival no tabata posibel sin e sosten di Prins Bernhard Cultuurfonds Caribisch Gebied, Setar N.V., Ateliers ’89 y Smart and Fast Cargo. Pa mas informacion bishita www.playafilmfestival.com.