(DiarioLibre) – Na 2021 inversion di exterior na Republica Dominicana a yega na US$3.102 miyon. Na 2021, aña di recuperacion di e golpinan causa pa e pandemia di 2020, inversion stranhero directo (Foreign Direct Investment; red.), a aumenta cu 21% compara cu e periodo anterior. Y si tuma e periodo mas amplio di ultimo 10 aña, e inversion stranhero a yega na US$27.000 miyon. E cifra aki ta esun mas halto di region di Caribe y ta pone Republica Dominicana entre e 10 paisnan di America Latino y Caribe cu mas inversion di exterior.
E cifranan menciona a ser ofreci pa e Centro di Exportacion y Inversion di Republica Dominicana (ProDominicana), entidad cu diamars pasa a realiza e nochi di “Reconocimento di Inversion Stranhero Directo na Republica Dominicana”, unda a entrega tal reconocimento na 10 empresa destaca, di e 700 cu tin na e pais. Conhuntamente e empresanan di capital internacional ta aporta alrededor di 200.000 empleo na e pais. Den sector turistico so tin mas di US$34.000 miyon inverti na capital stranhero.
Ta trata di entidad procedente di 57 nacion, cu pa decadas a impulsa e transformacion economico y social na e pais, segun declaracion di Raquel Peña, vice-presidente di e republica. Peña a indica cu e cifranan ey no ta pa casualidad, sino ta bin di un esfuerzo di gobierno enfoca riba fortalecimento di e sistema di husticia, di seguridad huridico y e exhibicion den exterior di un sistema trasparente den administracion di fondonan publico.
Biviana Riveiro, directora ehecutivo di ProDominicana, a destaca iniciativa di gobierno pa sigui cu conquista empresa stranhero, cu entre otro digitalizacion di registro di inversion stranhero directo, simplificacion di tramite burocratico, conformacion di un gabinete di promocion, y e ley nobo di aduana.
