Kico ta tras di e calor extremo actualmente na Aruba?

Fundacion pa scolnan Catolico na Aruba, SKOA, a demostra su preocupacion pa e calor extremo e dianan aki door di implementa un variedad di medida: no mag tin les di gym pafo, mester permiti tur mucha bebe suficiente, y hasta a reduci e cantidad di ora na scol.

Asina e directivanan di e 46 scol di e fundacion a ricibi un carta pa tuma medida, segun director Anuesca Baly a bisa portal noticiero Caribisch Netwerk.

Di su banda, Jonathan van der Linden, Maintenance Specialist na NV Elmar a splica Bon Dia Aruba cu berdad ultimo tempo Elmar ta confronta nan mes cu varios storing den e red di Elmar, y tin parti di calor cu ta hungando un factor grandi.

E biento friu cu normalmente ta supla for di lama, awo no t’ey. Tin comentarionan serio tambe di residentenan den area di e dump na Parkietenbos, kehando di e mal holor cu ta keda den e sitio.
Algun residente ta huy di nan hogar pasobra nan no ta soporta, segun e articulo di periodista Sharina Henriquez. Hasta barionan cu usualmente no ta sufri di e problema, tin residentenan ta keha cu nan por hole Parkietenbos.

Siman pasa, e calor severo a genera problema cu coriente. E uso di electricidad riba e isla nunca tabata asina halto manera den ultimo dianan. E peak promedio na e productor di energia WEB ta 135 megawatt, y siman pasa e tabata 150 megawatt. “Esey ta bin en berdad door di e aumento den consumo di energia pa via di calor”, segun vocero Asja Dongen. “Hopi hende awo ta bisa cu uso di coriente ta bon pa nos, pasobra e ta genera mas entrada”, el a comenta. “Pero esey no ta e caso.”

Ta costa e compania net mas pa laga e motornan produci mas energia, loke ta nifica inversionnan adicional y mas combustible, loke no ta un solucion duradero. “Pa e motibo aki semper, tambe riba dianan cayente: haci cuidadoso cu energia”, Dongen ta destaca.

Tambe por mira cu den e dianan aki rond 9’or di anochi e ‘peak’ ta halto pasobra tur hende ta yega cas, nan ta sende nan airco , tambe awor tin mas vehiculo di coriente, pues e demanda ta halto. Den e ultimo siman, Elmar a experiencia un ‘peak’ cu nunca nan a experiencia prome. Segun Sr. Van der Linden a bisa Bon Dia Aruba, e capacidad ta na 256 megawatt di transformer, kiermen tin suficiente espacio di capacidad. Pero aki aya tin incidentenan cu por pasa. Esaki ta cosnan cu por pasa full rond Aruba pues no ta cuestion cu un bario por wordo afecta mas cu e otro.

Pero cu un temperatura cu ta sinti entre 36 te mas di 40 grado Celsius merdia, ta dificil pa haya frescura na otro lugar cu no ta paden cu airco cendi. E airco ademas ta keda cendi henter anochi den mayoria di camber na Aruba – ya cu hasta ora e solo ta baha pa 7or y mey di anochi, e temperatura ta keda rond di 30 grado.

Medionan di comunicacion critico riba Meteo

“Ya durante e tres aña cu mi ta director, cada aña ta bin un carta asina cu medidanan di precaucion. Principalmente pa e cinco scol cu no tin airco”, Baly a bisa Caribisch Netwerk. “September semper ta asina cayente.”

Hasta gabinete di Aruba a duna un conseho relaciona cu e calor.

Pero asina cayente? Baly no a mira advertencianan pa calor, loke p’e a bira un motibo pa e mes gara telefon y yama departamento meteorologico. “Mi ta sigui Meteo di Corsou, cu ya anteriormente a adverti pa e calor extremo. Mi tabata kier sa con esaki lo bay pa Aruba.”

Medionan di comunicacion Arubano ya tabata riba esaki. “Incomprendible cu e advertencianan pa clima di e institutonan di clima aki ta varia mientras cu e islanan ta asina cerca di otro”, segun un website noticiero local. Esey a genera reaccionnan negativo tocante e capacidad di meteorologo David Barkmeyer, kende ta director di departamento di meteorologia di Aruba. Remarcable ta e atakenan y comentarionan pa su origen Curasoleño. Esey a sucede tambe juni ultimo, na momento cu e pronostico pa tormenta Bonnie ainda tabata aceptable.

“Tur ta para riba nos website, pues eynan ta unda hende mester bay mira”, Barkmeyer a bisa Caribisch Netwerk den un reaccion. “Esaki ta hopi normal. E periodo mas cayente di e aña y e por dura hasta comienso di october.”

Pakico hende ta kehando masalmente awo? E no tin un splicacion pa esaki. “Hende ta yama nos hopi tambe. E ta calor, berdad, pa esaki nos a adverti tambe. Pero esaki no ta abnormal.”

Si e calor extremo den ultimo dianan ta pa motibo di cambio climatico, no por bisa directamente. “No, realmente no, pasobra e clima ya tin mas di cincuenta aña ta cambia.” Barkmeyer ta splica cu den e temponan aki ta sinti asina cayente tambe pa motibo di e forsa di solo: 12 riba UV index. Esey ta asina halto cu e conseho pa cu esaki ta pa keda paden.

Algo cu tambe ta comun den e temporada aki ta falta di biento, ya cu disturbionan den e area ta chupa e biento bay cune. Siman pasa, e culpable tabata Horcan Earl.

E biento friu cu ta bin di lama, cu ta haci nos isla desierto toch soportable, awo ta sinti mas manera un forno. “Biento ta cayente, pasobra e ta bin di sur occidente, for di continente Sur Americano.” Barkmeyer ta splica loke hopi habitante no sa: maske islanan ABC ta rondona pa lama, e clima ta wordo determina pa e continente. “Si nos tabata sinta dos pa tres grado mas den nort occidente, e ora lo tabata mas fresco. E ora nos lo tin un clima berdaderamente di lama.”

Potret di Sharina Henriquez pa Caribisch Netwerk.