Apertura di frontera cu Venezuela y cumplimento cu normanan presupuestario acorda cu Hulanda ta prioridad di Gabinete Evelyn Wever Croes II pa e siguiente Aña Parlamentario. Esey a sali afo di e discurso cu Su Excelencia Gobernador Alfonso Boekhoudt a hiba na ocasion di Apertura di Aña Parlamentario nobo.

Gobernador Boekhoudt a cuminza pa bisa cu Aruba tin e oportunidad pa bira mas fuerte y siña les di e experiencia di ultimo añanan, particularmente e resultado di e pandemia di COVID-19.

“Nos pais a sali di e tempo duro, cu yudansa, pero nos situacion ta keda delicado. Nos economia, sosteni pa e actividad principal, turismo, ta mustrando señalnan di recuperacion fuerte. Sinembargo e efectonan riba finanzas publico y e ambito social lo tin nan impacto pa hopi aña ainda,” Gobernador a bisa, mustrando cu esaki lo ta refleha riba presupuesto di e pais.

Pa recupera completo riba tur nivel ta esencial pa logra union, solidaridad y respet. Gobierno mester demostra disciplina financiero, motiva inversion priva y publico y “tuma accionnan concreto den conhunto y dialogo cu gruponan di interes pa drecha e bienestar di e pueblo.”

Pero pa ta miho prepara pa siguiente desafio mester di reforma structural y mester fortalece e debilidadnan exponi. Gobernador a mustra cu Presupuesto 2023 ta refleha reduccion di gasto y aumento di entrada. Gasto di interes riba prestamo ta pisa hopi riba finanzas publico, cu mester bira duradero y responsabel. E normanan palabra cu Hulanda lo sigui ta e guia.

Ta trahando riba mas di 60 punto di accion riba ocho area di maneho segun e pakete di reforma, pa cual ya caba tin plan di ehecucion traha den cuadro di e masterplan ‘Reposicionando Rumbo di nos Pais.’ Den e presupuesto 2023 tin 12.5 miyon florin destina pa implementacion di proyectonan aki, Gobernador a splica.

Meta di e paketenan di reforma ta pa crea un base economico mas solido cu lo permiti nos recupera mas liher den caso di otro contratiempo economico. “Den e cuadro aki y den dialogo cu Hulanda lo sigui enfoca den e periodo nos dilanti riba e plannan pa fortifica nos economia, finanzas publico, organisacion di gobierno, cuido di salud, enseñansa y estado di derecho.”

Gobernador tambe a papia di e maneho energetico di Gobierno. “Pa e siguiente añanan Utilities Aruba hunto cu WEB y ELMAR lo tin e tarea pa ehecuta e maneho di energia basa riba produccion di energia di manera limpi, renovable y pagabel. Pa por logra e meta aki gas natural den forma likido lo por sirbi como combustibel di transicion.”

Su Excelencia Gobernador ademas a enfatisa e necesidad pa haci e transicion pa un economia cu ta sostenibel, circular y inclusivo. “A institui e Comision Recuperacion Economico pa crea un plataforma pa dialogo cu sector priva y demas gruponan di interes. Den dialogo lo discuti proposicionnan pa incentivo fiscal, mehoracion di clima di inversion y diversificacion di nos economia cu atencion pa principionan di sostenibilidad.”

Gobernador Boekhoudt a ilustra plan pa revitalisa centro di Oranjestad, cu ta bay celebra 200 aña y cu despues lo sigui cu e trayecto di revitalisacion di San Nicolas.

Boekhoudt a splica e creacion di un Fondo di Sostenibilidad pa contribui na proyectonan pa economia circular y desaroyo sostenibel, manera agricultura sostenibel y innovativo. “Dialogo ta tumando lugar un biaha mas pa logra reapertura di e frontera maritimo cu Venezuela pa importacion di fruta, berdura y otro productonan comestibel. Esaki lo contribui na reduci e presion riba costo di bida na Aruba.”

Lo percura pa un mercado laboral mas diligente y eficiente, basa riba ley y reglanan vigente, y e proyecto ‘Aruba Kier Traha’ di Enseñanza pa Empleo, lo mehora habilidadnan di tur trahado. Tambe lo pone atencion pa mehora y proteha derecho di consumidor, pa medio di e Aruba Fair Trade Authority, cu mester percura pa mihor calidad di servicio, calidad di producto y prijs mas husto pa e consumidor. E ley di credito di consumidor mester produci un sistema di registracion di credito y lo tin un un campaña di educacion financiero pa famianan. “Lo fortifica e departamentonan concerni pa ta e voz y defensor di e derechonan di e consumidor.”

Gobernador a bisa Aruba tambe lo conmemora 160 aña di abolicion di sclavitud na 2023 y a pone atencion riba e trabao di Archivo Nacional pa documenta e historia aki.

Gobernador a referi na enseñansa como e vehiculo mas poderoso pa desaroyo duradero y cu e mester ta accesibel pa tur hende den comunidad, pa brinda oportunidad continuo na hobennan. “Lo enfoca riba mehoracion di calidad door di optimalisa e structura di cuido, brinda acceso na maestronan pa mas curso y guia, optimalisa e conexion entre e diferente tiponan di enseñansa y na funcionnan den e sector laboral.”

Enfoke riba maneho di turismo ta pa yega na e nivel di turismo prome cu pandemia, sigui cu diversificacion y mehoracion di e producto Aruba. “Lo mantene un bista hopi cla riba un maneho di turismo sostenibel, teniendo cuenta cu e balans necesario entre turismo, economia y nos naturaleza,” Gobernador a subraya, agregando cu mester yega na un balans entre naturalesa y accionnan di e ser humano, cu mishi tambe e maneho di desperdicio.

Den e area di cuido medico, meta ta pa sigui baha gasto pa asina yega na un seguro medico mas sostenibel cu enfoke pa proteha esnan mas vulnerable. “Lo sigui traha cu hospitalnan den Reino y region pa asina ofrece un cuido di calidad na nos hendenan. Tambe lo sigui enfoca riba desaroya y amplia specialisacionnan den sector di cuido.

Gobernador a mustra cu e ley di AruBIG lo yuda den e reto pa haya suficiente profesional di calidad local pa traha den e sector di cuido. E vision ta pa aumenta eficiencia y duna atencion na prevencion di malesanan cronico, entre otro pa brinda educacion con pa biba un bida mas saludabel practicando deporte. Salud Mental ta un prioridad di Gobierno pa e siguiente aña, particularmente pa adictonan ambulante, mientras cu bienestar di adultonan mayor tambe central.

Gobernador a urgi Parlamento pa traha na un union y solidaridad pa recuperacion genuino cu ta e fundamento di e estado di derecho. “Ta necesario pa nos siña respeta y comprende otro, balora e interes y necesidad di otro y pone diferencia un banda na momento cu nos Pais mas mester di dje,” el a conclui.