Inspectie Volksgezondheid Aruba celebrando nan di cinco aña enfoca riba cuido medico

Pa conmemora e di cinco aniversario y tambe pa duna informacion tocante e conferencia ‘Quality of Health Care Conference IVA 2022, Inspire and Be Inspired’ Inspectie Volksgezondheid Aruba a haci un conferencia pa trece dos puntonan aki dilanti.

Frances Rugebregt communicatie adviseur di e departamento aki a splica cu e conferencia aki lo tuma luga e dianan 25 y 26 di november proximo na Boulevard Events Aruba y cu ta dirigi pa dunadonan di cuido.

E tema aki a wordo scogi segun Rugebregt a señala cu den e cinco aña di existencia nan a realisa cu un di e problemanan mas grandi cu nan tin ta cu no tin hopi comunicacion entre e dunadonan di cuido y cu esaki ta hopi bon pa siña di otro, e ora ey nan a bin riba e frase Inspire and Be Inspired pa motibo cu esaki ta un plataforma unda cu nan por dialoga cu otro, duna nan best practices y alabes siña di otro, esey ta e idea di e conferencia.

Dia 25 di november e lo cuminsa 8or di mainta te cu 4or di atardi y dia 26 di november e lo ta te mita di dia for di 8or di mainta te cu 1or di merdia.

Rugebregt a bisa cu den e conferencia lo trece dilanti cinco tema central cu ta esun cu durante e cinco aña di nan existencia nan ta considera cu ta hopi importante como liderazgo, organización di calidad di atención medico, organización di aprendizahe, comunicación den atención medico y colaboración den atención medico.

“E cinco temanan aki ta temanan cu nos a realisa cu ta importante entre dunadonan di cuido y e ta dificil ora nan no por comunica bon cu otro y p’esey e cinco punto aki ta hopi esencial pa asina ey e cuido por cana den un miho manera posibel”, el a bisa.

Dunadonan di cuido por cuminsa registra gratis riba NASKHO su website cu ta www.naskho.org cu conhuntamente cu Inspectie Volksgezondheid Aruba ta organisando e conferencia aki ya cu nan tin experiencia riba organisacion di conferencianan tocante cuido medico.

Di su parti, Dorylee Pappers-Lopez Penha inspector general di IVA a comenta cu di loke ta trata e celebracion di cinco aña di e departamento nan kier para keto cu for di comienso cu a bin un ley te cu awor unda nan ta para awendia, como inspectie nan a pasa un trayectoria cu hopi cos a tuma luga y p’esey ayera mes nan a tuma un par di ora pa celebra entre trahadonan.

“Den cinco aña nos a ripara cu hopi hende ta traha cu cuido pero toch no ta conoce otro, como inspectie nos kier mehora pa traha lo mas hunto posibel y nos kier duna e dunadonan di cuido e plataforma pa nan tambe pa nan duna nan parti”, el a sigura.

For di cinco aña pasa nan a cuminsa traha e ley di inspectie cu ta basa riba calidad y cu sin e ley aki nan no por haci nada manera Pappers-Lopez Penha a menciona ora tabata un departamento sin autorisacion pa por haci e control necesario.

“Na momento cu nos a cuminsa, nos a cuminsa implementa e ley y lanta un departamento hunto unda cu den un aña y mey nos tabata traha procesonan y controla na mesun momento, nos ta wak cu e departamento ta esencia caminda cu nos tin un rol importante pa pashent pasobra nos enfoke semper ta keda cu door di e dunadonan di cuido nos ta purba di mehora e calidad di cuido pa e pashent”, el a expresa.

Den su opinion, e ta considera cu control ta esencial y cu tin hopi tereno ainda cu nan tin cu enfoca riba dje cu den cinco aña nan no por a haci loke ta nifica cu e trabou ta sigui.

Asina mes, el a declara cu nan a cuminsa un trayectorio caminda cu nan por ta satisfecho cu e resultadonan pero nan kier sigui haci hopi mas “pa nos den e dienst nos ta limita den e cantidad di hende, cu nos tin hopi hende ta pensa cu inspectie ta den e parti di circuito legal pero tambe tin un circuito ilegal unda remedinan ilegal ta drenta, nos ta haya dokternan cu no ta dokter, tur esey ta parti di e control y nos ta controla 250 dunado di cuido lo cual cu hospital ta conta como uno”, Pappers-Lopez Penha a informa.

Di loke ta trata e retonan cu nan ta presenta, ademas, Pappers-Lopez Penha a bisa cu Arubig a yuda nan cu e registracion di e profesionalnan lo cual nan no tabatin como local unda cu eynan tambe tin herment cu ta hinca den dje, nan tin un bon cooperacion cu Ministerio Publico y cu Inspectie di Hulanda caminda cu nan kier haci hopi cos pareu pero nan a ripara cu nan mester bay riba e puntonan mas esencial y purba como inspectie no bay solamente tras di algo cu a pasa sino traha den esencia di e cuido medico.

Ademas, el a finalisa cu comunidad mester sa kico ta nan derechonan como pashent y tambe kico nan como inspectie por yuda.