Ayera mainta durante un conferencia di prensa, Fundacion Anti Droga Aruba (FADA) pa di tres aña consecutivo a lansa su di cuater temporada di documentario basa den bida real, cu tin e obhetivo di informa, educa y conscientisa henter comunidad.

Rubiella Toppenberg, trahado preventivo di e fundacion aki, a señala cu esaki ta pa informa, educa y conscientisa henter comunidad tocante uso y abuso di substancia, adiccion y salud mental.

“E idea ta cu e aña aki nos lo tin un serie di documentario basta enorme den informacion, unda cu otro siman dia 15 september e prome ta bay sali y nos ta invita tur comunidad di Aruba pa tira un bista riba esaki y laga nos hobennan forma parti, pasobra e informacion ta hopi importante pa nan”, el a sigura.

Diariamente nan ta haya diferente situacion, y Toppenberg a menciona cu nan ta haya casonan y e ta haya cu ta importante pa hobennan mira e informacion aki, pa motibo cu “esey ta e bida real”. “Hendenan ta bay papia di diferente topico, entre nan adiccion cu salud mental, e cual ta bati na porta di diferente cas”, el a bisa.

E aña aki nan lo tin cinco historia diferente, unda cu Toppenberg a señala cu e ta kere cu e meta ta cla y a pidi pa comunidad haci bon uso di dje.

Tocante e reaccion cu nan a haya pa cu esaki, Toppenberg a bisa cu esey tabata positivo y cu te ainda nan ta sigui scucha e comentarionan. El a bisa tambe cu e prome aña di documentarionan tabata basa riba adiccion so, den e parti di uso, rehabilitacion, personanan cu ainda tabata adicto ambulante. “Mi por bisa cu e historianan tabata hopi impactante pa comunidad, mirando cu no tabatin serienan asina aki pa hopi tempo. Y despues di esaki mi ta kere el a haci un impacto grandi, no solamente riba hende adulto, sino tambe riba e hobennan pasobra na momento cu nos ta duna charla, hopi biaha nos ta indica na e documentarionan y hopi biaha bo ta scucha e reaccion back tambe”, Toppenberg a declara.

Despues cu e fundacion a involucra cu e topico di salud mental, tambe esey a bin dilanti, unda cu den otro documentario tabatin e historia di depresion y ansiedad. Nan a haya reaccion riba esey tambe, caminda hende a sigura cu nan a haya forsa pa papia over di e topico pa via cu nan tabata sinti miedo. “Hopi biaha miedo y berguensa ta pone cu un persona ta prefera di wanta loke e ta sinti en bes di busca un ayudo, y cu esaki nan ta sinti un empuhe pa nan. Esey ta e meta su tras, pa esnan cu ta sinti un desbalansa cu nan salud mental of ta struggle cu un of mas adiccion, e idea ta pa haya un push pa wak kico ta importante pa busca ayudo trempan y na tempo”, el a comenta.

Igualmente el a expresa cu hopi biaha nan ta purba acerca diferente persona, pero ta dificil na momento cu nan ta den un crisis of na momento cu nan ta bao efecto di un substancia. “Nos ta purba, ora cu nos ta mira e cosnan aki cu otro stakeholders, nos ta papia cu otro pa wak kico por haci. Mi ta kere cu nos tin añanan ta boga pa un caminda netjes, drechi, pasobra tin mester di esey. Tin hopi hoben riba caya y esnan cu tin e tarea pa haci esaki pone un tiki mas atencion na dje y mi ta kere cu un centro di rehabilitacion netjes nos mester di dje”, Toppenberg a afirma.

Den su opinion, e ta pensa cu “nos ta den un tipo di crisis pa loke ta problemanan di adiccion y salud mental”, el a finalisa.

Di su parti, Amyma Kelly, kende tambe ta trahado preventivo di e fundacion, a trece dilanti e diferente casonan cu ta aparece den e documentario. Un di nan ta trata di un hoben cu a surpasa schizofrenia cu a haci diferente cosnan y cu na e momento ey, e mes no tabata consciente di loke e tabata haci. “E ta bay splica kico tur el a haci pa surpasa esaki tambe.”

Tambe tin otro historia di un hoben cu su tata y su mama tabata adicto ambulante y ta bay conta con esey a haci un impacto riba dje. Ademas un mucha muhe di Hulanda cu ta conta historia di su infancia cu el a pasa y e abuso cu e tambe a pasa aden, caminda el a yega di pensa pa comete suicidio.

“Esaki ta pa personanan sa cu tras di esaki tin ayudo pa loke e persona ta pasando, ta depende di kico e ta. Nos kier pa bo sa cu bo no ta bo so na e momento ey, cu tin hendenan cu ta cla pa scucha bo y por yuda bo pa busca un ayudo”, Kelly a bisa.

E prome documentario ta bay sali dia 15 di september, di dos capitulo 22 di september, di tres 29 di september, 6 y 13 di october di cuater y cinco capitulo, den e orario di 9or di anochi riba diferente plataformanan.