Club Kibrahacha pronto lo kier introduci liña di yamada oficial pa nos grandinan

Durante pandemia, Club Kibrahacha 60+ a habri un liña di yamada pa asina nos grandinan por a tin un oportunidad di yama y combersa cu un hende pa nan no sinti nan mes totalmente nan so. Esaki ta un iniciativa cu e club ta trahando riba dje pa haci e algo oficial pa nos grandinan den comunidad tambe por tin nan chat line gratis.

Kelsey Arends, beleidsmedewerker na Club Kibrahacha ta splica reportero di Bon Dia Aruba cu Club Kibrahacha 60+ ta enfoca hopi riba actividadnan social y recreacional, anto awor lo sigui expande e parti aki. For di aña pasa, y durante 2022, a enfoca hopi riba e parti di salud y ta trahando hunto cu tres otro fundacion, CBA, Aruba Heart Foundation, Fundacion Diabetes, unda tin tayer cu e clientenan ta haya informacion tocante salud, nutricion y mas. Tambe nan ta haya les di cushina pa siña traha cumindanan mas saludabel. “Esey nos ta organisa pa nan y tambe nos kier enfoca riba tripnan pa nan, cu nan por bay diferente caminda, haci diferente actividadnan tambe pa nan siña conoce otro y trece nan mas cerca di otro,” Kelsey ta splica.

Na momentonan aki pa loke ta fondo, e Club tin nan actividadnan di recaudacion di fondo tumando luga di loteria, cual ta uza mastanto pa funda actividadnan regular y special. Pero tambe kier bin cu un liña di yamada pa hende grandi, cual lo ta gratis. Esey tambe ta haciendo pa genera fondo pa bin cu ne pronto. Ora cu pandemia mes a cuminsa na Aruba, esaki a wordo haci trahando cu varios otro organisacion a bin cu esaki. Na unda cu hendenan grandi por a yama na e club y uza esaki como un ‘Chat Line’, door cu tabata cera na cas sin ningun hende pa papia cu ne, esaki tabata ta ideal pa tin un persona pa papia cune.

Durante e periodo aki, hopi hende tabata yama cu varios problema manera falta di cuminda y varios problema social. “Nos ta bezig cu tur esey pa wak con nos ta bay introduci esaki.”

Nan a haya un liña special for di Rampenbureau e tempo cu nan a haci esaki anto e numbernan tabata drenta eynan, y esaki tabata wordo parti cu diferente boluntario. E bunita di esaki ta cu nos grandinan ta ricibi e atencion y oido ora cu nan ta mas mester di dje tambe. E iniciativa aki tambe ta perfecto pa yuda e club comparti informacion, conocemento y tambe riba parti di conscientisacion y mas.

Kelsey ta sigui na splica reportero di Bon Dia Aruba cu hopi di nan cliente ta sumamente contento di ta na e facilidad na momentonan aki. Despues di e pandemia, manera cu nos a informa anteriormente, door di siguridad nan no tabata tin mag di bin e centro, despues di un tempo di ta mucho nan so nan cas nan ta feliz di por ta bek na e centro. Durante e pandemia nan a haya hopi miembro nobo tambe. E centro a cera solamente durante un periodo di cinco siman, durante esaki nan tabata tin nan Summer Camp, pero no ta tur cliente ta bin esaki. Esunnan cu a bin tabata hopi emociona cu e centro a habri bek despues di un luna mas o menos di ta cera.

Club Kibrahacha ta gusta na cuminsa puntra e clientenan kico nan kier pa asina por formula actividadnan rond di esaki y pa asina nan sa poco mas kico e clientenan ta haya leuk of nunca a yega di haci ainda.

“Tin biaha otro organisacion ta acerca nos y nos ta haci actividadnan hunto cu nan,” Kelsey ta splica. E club semper ta pidi hende pa bin yuda como boluntario pasobra semper mas cabes y man ta yuda pa logra na haci mas. Actualmente nan ta trahando cu mas o menos 35 boluntario, pero riba cada dia ta bin un cantidad particular, pues un dia tin shete persona y otro dia kisas menos. E boluntarionan tambe ta zorg pa e actividadnan, nos ta yuda nan cu materialnan anto nan mes ta bin cu proyecto pa hendenan. Nan tin tres boluntario tambe cu ta yuda den oficina.

Pa loke ta e liña di yamada, e club ta trahando riba esaki pa pronto por haci e oficial. No tin un fecha of bista ainda riba ki tempo esaki por wordo realisa pero manera ta asina leu e club lo sa di informa comunidad debidamente.