Raad van Advies y Gobierno ta bisa cu: Presupuesto 2023 no a tene cuenta cu protocol firma entre Hulanda y Aruba

Gobierno no a sigui e normanan presupuestario stipula den protocol di 2018 cu Hulanda, pa motibo cu e regimen di supervision financiero lo tene cuenta cu e realidad post COVID. Asina Prome Minister Evelyn Wever Croes na nomber di Gobierno a reacciona riba e ponencianan di Raad van Advies como reaccion riba e concepto di Ley di Presupuesto 2023.

E organo consultativo ta haya yamativo cu Gobierno ta di opinion cu mester revisa e protocol cu Hulanda y Aruba a firma pa e normanan presupuestario pa motibo di e pandemia di COVID-19. Gobierno a señala den e asina yama memorie van toelichting cu e normanan stipula ta data prome cu COVID, y no ta tene cuenta cu e realidad financiero economico nobo y actual di pais.

E pregunta crucial, segun e instituto, ta si pa yega na un finanzas publico sostenibel, solido y transparente mester di ahustacion basa riba e impacto di COVID-19. Ademas cu e saldo financiero pa 2023 ta proyecta di ta un deficit di 0.3 porciento di e Producto Bruto Interno, y como tal no ta segun normanan di e protocol, cu e normanan aki ainda ta den proceso di actualisacion.

Raad van Advies a mustra cu riba 20 di Januari 2022, Hulanda y Aruba a yega na acuerdo pa extende e protocol riba normanan presupuestario te cu 31 di December 2023, sin cu a ahusta e contenido di e protocol. Mas ainda, Gobierno di Aruba no a haci ningun peticion na Conseho di Minister di Reino pa desvia di e normanan, ni tampoco basa riba e consecuencianan di e pandemia. Esaki lo por tabata posibel a base di articulo 23, inciso 1 di e landsverordening Aruba financieel toezicht, LAft cu ta permiti desviacion di normanan estableci.

Esey ta nifica pa Raad van Advies, cu na 2023 mester tin un surplus di un porciento. Sinembargo, e deficit na 2023 lo ta 20.1 miyon florin cu ta 0.3 porciento di e Producto Bruto Interno. “Cu esaki ta mustra cu no ta cumpli na normanan den e protocol cu Hulanda,” Raad van Advies a bisa, mustrando cu esaki ta nifica cu tampoco lo logra yega e norma presupuestario palabra pa e añanan despues di 2023. “Si kier cumpli a corto plaso cu e normanan di saldo financiero pa por logra finanzas publico sostenibel, Raad van Advies ta kere cu ta necesario pa denter di e cuadro financiero stipula, haci escogencia y pone prioridad cu mester conduci na reduci structuralmente e gastonan presupuesta.”

Prome Minister Evelyn Wever Croes sinembargo a reacciona bisando cu Gobierno a logra den tres aña baha finanzas publico na un nivel aceptabel of manehabel. “Gobierno a experiencia un crisis cu unicamente a pone e posicion di debe empeora, un posicion cu a bira hopi fragil pa motibo di deficitnan grandi entre 2009 y 2017. E acercamento actual ta pa yega na calculonan mas realistico posibel, cu control riba ahustacionnan y tur esaki lo produci un mehoracion di e saldo financiero y tambe e perspectiva multianual. Mayoria reforma ainda ta den desaroyo y no tin un bista concreto riba e efecto a largo plaso di nan riba e entrada y gasto di Gobierno.”

Como tal a scoge pa 2023, traha cu tareanan multianual cu poco poco lo keda ahusta cu medidanan concreto cu ta procedente di e reformanan. Mas ainda, mester indica cu cera e buraco presupuestario cu a bin despues di e periodo di coronavirus, ya no ta compatible cu e normanan palabra prome cu COVID, segun Gobierno. Prome Minister a enfatisa cu Hulanda y Aruba a extende e protocol di 2018 pa por facilita e proceso di supervision financiero, pero ta trahando ainda riba e concepto di rijkswet Aruba financieel toezicht, RAft. “Tin discusionnan tecnico y investigacionnan andando pa formula normanan nobo, basa riba entre otro e recomendacionnan di Raad van Advies mes y Raad van State pa logra e normanan nobo y con realistico nan ta pa Aruba den e periodo post-Covid.”

Inflacion

Opinion di Raad van Advies ta cu e crecemento economico cu ta contribui na e Producto Bruto Interno nominal, lo sigui crece na 2023 a pesar di inseguridadnan global. Di otro banda, e ultimo efectonan di e pandemia como tambe e guera na Ucrania lo tin nan efecto riba economia mundial. Inflacion continuo, particularmente riba e mercado di cuminda y energia, interesnan cu ta subi riba mercado financiero y problemanan logistico den transporte internacional ta factornan cu segun Rad van Advies lo por stroba e recuperacion economico.

Pa e motibo ey mes, Raad van Advies ta compara e cifranan di crecemento proyecta pa Fondo Monetario Internacional, IMF y esun di Direccion di Asuntonan Economico, Comercio y Industria, DEHZI. IMF a calcula un crecemento economico nominal di 5.2 porciento y un crecemento real di 3.7 porciento pa Aruba. DEHZI di su banda a bisa cu e expectiva di crecemento economico pa 2023 lo ta 5.1 porciento. Esaki lo resulta na un Producto Bruto Interno di 6.202 miyon florin. DEHZI a tene cuenta cu aumento di awa y coriente y caida den comercio pa motibo di e BTW. A base di e calculacion aki, Raad van Advies a bisa cu inflacion na Aruba pa 2023 lo ta 10.7 porciento cu den termino real ta un contraccion considerable di economia. Raad van Advies ta di opinion cu e splicacion di e ley di presupuesto 2023 no a tene cuenta cu un crecemento real negative di economia y cu esaki lo tin efecto pa e presupuesto multianual di Aruba. Consequentemente, Raad van Advies ta limita den forma un opinion di e nivel realistico di e cifranan cu Gobierno a presenta den presupuesto.

Prome Minister Wever Croes a bisa cu no ta reacciona riba e punto aki, ya cu no ta introduci e BTW pa 2023 mas ( red. pero no a splica e impacto di introduccion di e aumento di BBO. Analistanan a mustra Bon Dia Aruba cu e aumento di BBO combina cu aumento di prijs di awa y coriente tambe lo tin efecto inflatorio grandi).