(ElPais) – Diaranson ultimo, Gustavo Petro a firma e extradicion pa Merca di e ruman di e senador Piedad Cordoba ken ta acusa pa trafico di droga, Cordoba tabata un aliado di e presidente durante e campaña electoral.
E problemanan constante cu husticia di Cordoba y su familiarnan a causa cu Petro a pidie den publico pa stop di dun’e su apoyo memey di e proceso electoral. Cordoba, un politico di un perfil halto pa su relacionnan cu Hugo Chavez y su mediacion pa liberacion di secuestradonan di FARC, a tuma esey como un humiliacion y a distancia di Petro, actual mandatario.
Awor Petro a autorisa e traslado di su ruman pa e wordo husga pa un corte na districto sur di New York, cu e menasa di un sistema di prison mas fuerte cu esun Colombiano.
E presidente a haci e anuncio aki priva durante e entrega di credencialnan di e embahador nobo na Colombia, Feliz Plasencia. Asina ta caba cu e polemica cu tabata acompañ’e desde cu el a asumi e funcion. Hopi tabata esun cu tabata pensa cu Petro no lo a extradita Alvaro Freddy Cordoba pa su lasonan politico cu Piedad, un nomber di peso den coalicion di iskierda cu a caba di yega na poder. Corte Colombiano a duna luz berde na e deportacion, tabata falta e firma di e presidente, den campaña el a bisa cu e ta bay haci’e y finalmente el a cumpli.
E ruman chikito di e senador ta acusa di haya dos kilo di cocaina pa supuesto cumpradonan Mexicano cu a resulta di ta agentenan infiltra di DEA. E funcionarionan Mericano a pidi’e pa e mustra un cantidad importante di droga pa cuminsa negocia e envio pa Merca. Ora Alvaro a aparece cu e paketenan, el a keda deteni door di e agentenan. Segun Piedad a afirma, nan a gaña su ruman y nan a pone e mercancia den man di Alvaro. Un tribunal di New York a pidi Alvaro su extradicion y Corte Supremo a duna via liber na augustus.
