(LaPatilla/Argus) – E empresa di ‘joint venture’ PetroBoscan, di Chevron y empresa estatal Venezolano Pdvsa, cu ta procesa crudo pisa na estado Zulia, tabata fuera di operacion por lo menos desde juni 2022, fuentenan di ambos compania na Caracas y Maracaibo a revela na agencia noticiero Argus. Segun un fuente anonimo, produccion a para dia 8 di juni.
E operacion na estado Zulia ta un di e dos empresanan di joint venture, e otro ta PetroPiar na estado Bolivar, cu ainda tabata opera durante ultimo añanan, como excepcion riba e sancionnan Mericano contra gobierno Venezolano.
PetroBoscan tabata produci alrededor di 22.000 bari pa dia (bpd) na momento di su ciere, segun analistanan di Gas Energy na Caracas.
E caida di PetroBoscan a contribui na reduccion di produccion di e division Occidente, di alrededor di 150.000 bpd te 98.500 bpd na augustus, segun Gas Energy.
E paro a tuma lugar despues cu gobierno di Nicolas Maduro a bisa funcionarionan Mericano na maart cu mester a aumenta produccion di petroleo pa yuda cu e emergencia energetico provoca pa e invasion Ruso na Ucrania na fin di februari.
Cu un capacidad pa procesa mas di 100.000 bpd di crudo pisa, usa principalmente pa fabricacion di asfalt, Boscan tabata produci te 80.000 bpd, te cu e sancionnan nobo Mericano, y un serie di problema structural, entre otro falta di transporte, a obliga termina produccion. Mientras almacenahe di crudo ta completamente ocupa, no tin transporte suficiente, pasobra poco compania ta tuma riesgo di sancion Mericano.
No tin un plan ainda pa reinicia produccion, segun un fuente na Chevron, argumentando cu e compania mester resolve su problemanan cu departamento di comercio y suministro di Pdvsa. Venezuela su produccion di crudo tabata na 661.000 bpd na luna di juli ultimo, 7% menos cu e luna anterior.
