(AP) – Riba dialuna China a acusa Washington di a drenta computernan na un universidad cu oficialnan Mericano ta bisa a haci investigacion militar, agregando na e kehonan di ambos Gobierno pa cu e spionahe riba otro.
Northwestern Polytechnical University a reporta cu a drenta nan computer den juni, segun National Computer Virus Emergency Response Center a anuncia. El a bisa cu e centro, trahando cu un proveedor di siguridad comercial, Qihoo 360 technology Co., a rastrea e atake y a yega na National Security Agency na Merca, sinembargo nan no a duna detaye na con esaki a ser haci.
China y Merca, conhuntamente cu Merca ta lidernan global den investigacion cibernetico.
China ta acusa Merca di spionahe riba e universidad, companianan di energia y internet entre otro. Washington ta acusa Beijing di horta secretonan comercial y a anuncia cargonan criminal den contra di oficialnan militar Chino.
E accionnan di Merca ta “pone den peliger e siguridad nacional di China,” segun minister di asuntonan den exterior su vocero Mao Ning. Tambe el a acusa Washington di a vigila telefonnan movil Chino y di a horta mensahenan di texto. “China ta condena esaki fuertemente,” Mao a bisa. “Merca mester inmediatamente stop di usa su ventahanan pa horta secretonan y ataca otro companianan.”
Embahada Mericano na Beijing no a responde inmediatamente na peticion pa comentario.
Expertonan di siguridad a bisa cu e parti militar di e partido Comuniwta People’s Liberation Army y e Ministerio di Siguridad di Estado ta brinda sosten na hackernan fuera di e gobierno.
Northwestern Polytechnical University, den e ciudad di Xi’an, ta den e lista di entidad di gobierno Mericano cual ta limita su acceso na e tecnologia Mericano. Washington ta bisa cu e Universidad ta yuda e ehercito PLA desaroya drone y tecnologia misil pa ambos bao awa y den aire.
Dialuna su anuncio a acusa Merca di a tuma informacion tocante e universidad su maneho di rednan y otro “tecnologianan clave”. El a bisa analistanan Chino a haya 41 “atake riba nan red” cu a sali for di NSA.
