Fiscal special anti-corupcion Tania Sterling a solicita un alerta cora via Interpol, cu obhetivo di detene Ricardo Martinelli Linares y Luis Enrique Martinelli, yiunan di ex-presidente Ricardo Martinelli, cu ta acusa di labamento di placa den caso di pago di soborno di banda di e empresa di Norberto Odebrecht.
Sterling a manda un solicitud riba 1 di februari pasa pa Comisionado Marcos Cordoba, hefe di direccion di investigacion hudicial di Polis Nacional, pa e direccion aki por manda pa oficina di Interpol na Panama.
Fiscalia ta desaroya un investigacion pa labamento di placa, caminda a lansa acusacion contra 17 persona, entre nan e rumannan Martinelli Linares y e abogada Evelyn Vargas Reynaga. Otro persona cu ta envolvi ta miembro di e sociedad anonimo cu a haya transferencia di placa, como soborno paga pa Odebrecht na Panama y otro paisnan. E caso aki ta diferente di e caso di Ramon Fonseca y Jurgen Mossack, socionan di e empresa Mossack Fonseca, pa labamento di placa den e scandal di Odebrecht. Corte supremo di husticia a solicita dia 28 di juni un alerta cora na Interpol y asina detene ex-presidente Martinelli, cu ta busca na Panama riba acusacion di tap telefon cu a sucede den gobierno prome cu Martinelli tabata na poder. Martinelli ta biba awor na Miami, Merca.
