Minister Rocco Tjon: A conta cu aprobacion di parlamento den su totalidad pa proyectonan clave den e cuadro social y hudicial

Dialuna mainta, minister di Husticia y Asuntonan Social Rocco Tjon a atende un reunion di comision central, caminda a pidi aprobacion di Parlamento di Aruba, pues a busca e “gevoelens” di Parlamento pa ayudo financiero pa Respaldo.

Mas specifico, a pidi un suma di 300mil florin pa asina surpasa e retonan cu nan ta confrontando actualmente. Na mes momento a haya aprobacion tambe, pa pasa e fondonan di AZV pa e ekipo cu ta encarga pa atende cu e lista di espera, pa loke ta e parti di salud mental. Banda di esaki, a haya aprobacion pa por pasa e cuater miyon Euro cu Hulanda a pone disponibel pa amplia sigurdad na nos frontera.

Segun e mandatario a splica, mirando cu ta trata di proyectonan cu un duracion di un aña, a ricibi varios pregunta di cada fraccion, di con ta bay continua cu esakinan a largo plaso. Pa contesta e preguntanan aki, minister Tjon a splica cu e ta importante pa e werkgroepen cu ta trahando aworaki den cuadro di GGZ percura tambe pa e “eerste lijn” keda lo mas accesibel cu ta posibel, pa asina evita cu tin listanan di espera. E prome resultado ta mustra cu pashentnan aworaki por wordo trata mas lihe, mirando cu tin un grupo adicional cu ta haci e triage. Na mes momento tambe ta ampliando e basis zorg pues e basis GGZ pa asina evita cu personanan ta wordo dirigi pa e parti di “specialistische zorg” esta; Respaldo.

Banda di esaki, a trata tambe e plan di accion pa loke ta siguridad na nos frontera, cual ta consisti di cuater miyon Euro cual ta designa pa diferente proyectonan. E parti infrastructural ta esun menos, pero tin e parti di opleidingen y e parti pa loke ta “handhaving”, ambos na e parti aereo como e parti maritimo, e proyectonan aki ta defini caba. E plan aki a wordo scirbi door di tur e stakeholders di e cadena hudicial akinan na Aruba y na mes momento a conta cu aprobacion di Hulanda tambe. Manera ta conoci tin coleganan na Aruba di Marechaussee cu ta yuda fortifica e siguridad na nos frontera door di traha hunto cu coleganan di entre otro, Inmigracion y e unidad di mensenhandel en mensensmokkel.

Por ultimo, minister Tjon a expresa cu e ta wak bek riba un reunion sumamente positivo, caminda a ricibi varios pregunta tecnico for di cada fraccion presente na e reunion, y na final a ricibi aprobacion di fraccion di MEP, Raiz y AVP, cual tur a bay di acuerdo cu cada peticion.