Ayera mainta durante conferencia di prensa director di DOW, Marlon Croes, a informa comunidad ariba e ultimo desaroyonan cu lo tuma luga pa loke ta trata e construccion di e rotonde situa na e crusada grandi di Palm Beach.

Manera DOW a menciona caba den e prome dos conferencia di prensa, lo yega un punto cu lo mester cera e crusada aki por completo pa dos dia pa por haci trabounan di asfaltamento riba e rotonde aki. E trabounan aki ta programa pa tuma luga dia 8 y 9 di september y lo inicia e ceramento e ceramento di e rotonde diahuebs dia 8 di september pa 12or di marduga.

Croes a splica cu diferente trabou lo wordo prepara pa haci e superficie unda cu autonan a core caba limpi pa asina por pone azeta back riba dje y e prome truck di asfalt lo yega den careda di 6or pa 7or di mainta pa asina cuminsa cu e trabou di pone asfalt pa 12 ora largo y finalisa esaki 6or pa 7or di anochi.

Despues e ekipo lo sigui cu trabounan den oranan di anochi pa pone e marcacionnan necesario riba e caminda pa asina nan por caba den transcurso di dia 9 pa alrededor di 3or di atardi y despues lo habri e rotonde back atardi pa anochi.

Mester enfatisa cu solamente e camindanan di parti pafo di e rotonde, buitenbaan, lo wordo habri pa motibo cu lo tin trabounan cu lo sigui tuma luga riba e isla memey di e rotonde y lo habri e camindanan parti pafo so pa garantisa seguridad di e trahadonan cu lo ta eherciendo e trabounan aki.

Croes a remarca cu e trabounan aki lo sigui, hunto cu Arubaanse Wegenbouw cu e meta pa dia 23 di september finalisa cu tur e trabounan di e rotonde y entrega esaki pa uso completo.

Algo cu ta hopi importante pa e automobilistanan sa, Croes a subraya, ta cu e cambio di ruta, desviacion, lo ta mas intensivo durante e dos dianan aki compara cu e prome dos biahanan pasobra durante e prome dos biahanan e automobilistanan por a haci uso di parti di e crusada y rotonde, pero aworaki e ta wordo cera por completo.

Por ehempel si un persona ta biniendo for di Malmok direccion pa Oranjetad, e lo mester drenta na crusada di Palm Beach Plaza, pasa via Irausquin Blvd. yega e crusada di ex House of Cheng pa subi avenida Nelson Oduber. Si ta bin di playa direccion pa Malmok/Palm Beach, tin dos opcion. Por haci uso di e u-turn cu tin traha caba riba Nelson Oduber, pasa riba Irausquin Blvd. y sali back na e crusada di Palm Beach Plaza, of por coy den e bario di Keito, pasa den Palm Beach, sigui e borchinan pa bay back na e ruta grandi.

“Nos a pruba, hunto cu Wegenbouw, planie di tal manera cu e tempo cu e crusada/rotonde lo ta completamente cera lo ta cortico pa asina tin menos influencia riba e fluho di trafico”, Croes a agrega.

Pa loke ta a contratiemponan cu a encontra na caminda pa e construccion di e rotonde aki, Croes a splica cu e contratiemponan cu nan tabatin tabata na inicio pa motibo di e haltura di e proyecto mes, pero esey, el a indica, nan a soluciona hunto cu Arubaanse Wegenbouw y e ingenieronan di DOW. Despues, el a sigui splica, e contratiempo mas grandi cu tabatin tabata e caida di awa na unda cu mester a maneha e nivel di awa y pone pomp pa saca e awa pa asina por a sigui cu e trabou riba caminda seco.

“Aworaki cu nos ta den un temporada toch bon, nos no ta kere cu lo bay tin contratiempo mas, solamente si e mashin daña of si nos haya un awasero duro den e proximo dianan nos dilanti”, e director di DOW a subraya.

Pa loke ta trata e problema constante di awa cu ta keda para den e area di saliña y riba Nelson Oduber Blvd, Croes a splica cu den e rotonde a traha un grepel hopi grandi cu por acapara e awa pa por hibe den e saliña. Pues, segun el a indica, e area di problema cu awa riba e caminda grandi ta isola for di rotonde, no ta conecta y den e caso aki si tin problema cu awa esaki no lo afecta e parti di e rotonde.

Manera ta conoci e caminda aki ta uno hopi transita y hopi automobilista ta core ariba velocidad halto, Croes a splica cu lo usa e marcacion riba e caminda, wowo di pushi y tambe lo pone borchinan necesario pa automobilistanan baha nan velocidad ora nan yega na e crusada aki.

Den caso di crusada pa peaton, DOW ta aplica e concpeto di zebrapad hopi pega cu e rotonde caba na otro rotondenan y den e caso aki lo aplica esaki tambe na e rotonde nobo. Otro concepto lcu lo por tabata un opciona, ta un brug pa crusa na halto, pero esaki, Croes a remarca, ta hopi costona y nan a ripara cu esun na Pos Chikito, cu tabata un inversion bastante grandi, toch e uso ta relativamente abao. “E peaton ta prefera di cana y crusa riba e caminda y no subi e brug pa crusa pa despues baha back”, el a bisa.

Tocando e tema di molester di RWZI, contestando pregunta di prensa, den e area di Eagle Beach, specificamente specificamente na altura di Coco Loco Bar, sa tin hopi molester cu e riool. E director di DOW a splica cu tin un proyecto andando y nan ta den e faso di warda e aprobacion pa tene un destaho y selecta un contratista pa haci e desvio di e rioolering den e area aki. E inversion pa e proyecto aki ta calcula na 250 mil florin.

“E tabata un problema cu den pasado nos a pone pleister riba e herida, pero e ta keda un pleister y no un solucion completo. Aworaki nos tin un solucion riba mesa cu ta rekeri un inversion di 250 mil florin”, el a agrega.