Scol Reina Beatrix ta den su edificio nobo. E scol cu desde 2014 tabata reparti den cuater localidad, awor ta na e edificio banda di Post Kantoor cu te cu recien tabata Scol Paso Pa Futuro.
Minister di Enseñansa a splica cu despues di reuni cu tur actor envolvi, a logra cu na Juli a cuminza ehecuta cambio di ubicacion di e scol di 315 alumno pa su edificio nobo y permanente (red. Esaki ta un plan cu ex Minister di Enseñansa dr. Rudy Lampe a presenta pero a confronta hopi protesta). E Minister actual a usa e mesun argumento sinembargo, esta cu Scol Paso pa Futuro ta un edificio di 17 lokaal y ta brinda hopi espacio. A yega na acuerdo cu cabezantenan y docentenan, “y mi ta hopi contento cu mi a keda informa cu awe ta prome dia di Reina Beatrix den su edificio nobo.”
Durante luna di Juli a haci e prome trabounan di mantencion. En todo caso, “Cabezante Rosalinda a avisa di ta hopi contento cu Reina Beatrix ta bou un solo dak y cu Gobierno por a stop di paga huur di varios localidad diferente. Pabien Reina Beatrix cu su edificio nobo, cu 15 lokaal den funccion, cu su gymzaal. Pues e scol ta completo. Nos ta sinti cu e docente y cabezante ta contento cu esaki.”
E Minister a gradici e personal di Scol Paso pa Futuro cu a coopera y cu entretanto ta ubica na Sero Blanco, unda Reina Beatrix tabatin 10 lokaal. E scol dirigi na enseñansa special tin 115 alumno cu ta den un edificio cu ta cuadra miho, danki na e hecho cu a agrega dos klas mobil.
Reina Beatrix lo habri Dialuna awor.
