Ayera merdia na JFK Education Center a tuma luga e firmamento di contract nobo di e instructornan di landamento. Durante e evento aki Minister di Enseñansa y Deporte, Endy Croes, a dirigi algun palabra na tur invitado presente y a aplica un poco di e proceso cu mester a cana pa yega na momento importante aki.

“Awe nos ta para dilanti mi ta kere sigur un progreso, un momento hopi importante pa e instructornan di landamento”, Minister Croes a expresa. E minister a inidica cu su prome reunion ora e la asumi e cartera di enseñansa y deporte tabata cu presidente di Sindicato SIMAR, Josephine Albertus, unda cu Albertus a expresa cu un di nan prioridadnan tabata pa cambia e contract di e instructornan di landamento pa uno mas faborabel.

E tempo ey e instructornan tabatin mas di 20 aña trahando cu un contract pa periodo di un aña, pero e ultimo aña ey, segun Minister Croes ta comenta, e instructornan a wordo pusha door di ex minister di enseñansa, Rudy Lampe, pa un OVO contract.

Na october di 2021 a firma un contract di un aña cu e instructornan atrobe y mientras tanto Ministerio di Enseñansa tabata mira di ki otro manera por traha otro tipo di contract cu por beneficia e insturctornan.

“Hopi di nan tabatin 20 aña, otro nan 25 aña ta trahadno caba. Nos a compronde e inkietud. Mas cu claro nos tabatin caminda pa cana, nos a pidi conseho na DRH, usa ley di contablidad cu bo por firma un contract di cinco aña. E proceso a tuma su tempo pero mi ta contento cu toch ora nos a haya consehonan positivo, a acerca back SIMAR y asina a sigui desaroya esaki na unda por cuminsa na firma un contract di cinco aña”, Minister Croes a remarca.

El a subraya cu kisas tabatin otro deseo, pero tabata e escogencia di awo of sigui bringa pa tempo un indefini, y cu esey riba mesa, segun e minister a compronde, mayoria mayoria instructor ta di acuerdo pa firma un contract di cinco aña.

E proyecto di landamento escolar a inicia dia 17 di januari di aña 1993 y a cuminsa cu 17 scol participando y e aña aki tin 34 scol basico y 2 scol special ta haya les di landamento. Minister a remarca cu durante aña escolar 2021- 2022 un total di 655 alumno di derde klas a gradua y a ricibi nan diploma A y 129 alumno a ricibi diploma B. Esaki ta nifica cu un total di 784 alumno a ricibi nan diploma.

Un total di 19 instructor di landamento a firma nan contract nobo pa un periodo di 5 aña. Minister Croes a gradici Directie Onderwijs, DRH y DPS pa nan cooperacion y colaboracion pa por a logra realisa e firmamento di e contractnan aki. Tambe e mandatario a felicita e instructornan cu a firma nan contract nobo y alabes a gradicinan pa e bunita trabou cu nan ta eherece.

Por ultimo, Minister Croes a recorda e trabou di e presidente di SIMAR, Josephine Albertus, cu a sigui pusha ora cu gobierno nobo a sinta y a pone e problematica aki como prioridad number uno ariba su lista di prioridadnan y asina e cambio di contract cu ta beneficia e instructornan di landamento ta un realidad. “Di curason mi kier a felicita boso, di curason mi kier gradici boso pa e bunita trabou cu boso ta desplega. Mi ta sigur locual nos a logra awe, e cinco añanan di contract, nos ta hopi contento cune. Nos kier a logra mas, pero esaki ta un bon inicio caba”, el a finalisa.