EPB San Nicolas moviendo den un era nobo di inovacion pa siguiente aña escolar

Director di EPB San Nicolas, Rensley Mathilda, ta informa cu aña 2022/2023 e scol ta habri cu un programa un poco diferente combina cu esun existente cu un grupo di studiante lo cuminsa cu e trayecto di digitalisacion. Un otro grupo di studiante lo sigui cu e parti cu ta actual, cu ta finalisa e parti aki.

Esaki ta cosnan cu mester wordo haci mirando con mundo ta sigui desaroya y inova nan sistemanan, y reto nobo ta cu lo mester percura pa tur docente keda cu maneho di les den forma digital. Mester bay profundisa e studiantenan tambe pa loke ta e parti digital y su habilidadnan den e era nobo cu ta bay pasa den dje awo. E studiantenan lo siña mas programa cu lo wordo guia hunto den un forma digital, e ta un programa unda lo sigui full cu e doorlopende leer-lijn hunto cu EPB y EPI, pa asina tin miho conocemento pa guia e studiante hopi miho riba un area profesional.

“Hopi biaha tin miedo di cierto proceso prome cu introduci un cambio di escala aki, tin miedo di tuma cierto pasonan pero esaki mester wordo haci,” segun Sr. Mathilda. Mescos por ehempel nos sistema of industria di auto ta cambiando den forma electrico, educacion tambe ta cambiando y por mira diferente otro scolnan a cuminsa riba dje. “Nos tambe lo ta un di e scolnan awo riba e lista cu ta cuminsa haci esaki pa por sigui den e forma aki pa e era nobo cu nos ta drentando.”

‘Studiantenan t’ey back cu yen entusiasmo’
Cu yen di entusiasmo e studiantenan di EPB San Nicolas ta back y ta hayando cierto informacionnan awor durante e prome dianan di scol. Actualmente tin 750 studiante na EPB San Nicolas y ta falta un grupo chikito ainda cu por drenta, ta bezig ta standarisa y evalua tur e klasnan e siman aki unda cu aki aya por busca fondo unda nan ta kisas si nan a bay den exterior of no, pero e scol ta buscando si. Tin un lista di espera y ta purba di laga tur studiante drenta. Sr. Mathilda: “Esaki lo ta un aña di drecha aki aya pasobra nos ta den un proceso nobo, mester tin pasenshi cu e docentenan, mester tin pasenshi cu e studiantenan tambe. Pasobra nos ta drentando den un sistema moderno y diferente, pero siguramente nos ta haciendo tur cos cu ta corecto. Aki aya por tin cierto erornan pero na final nos lo tin esaki den un forma netjes pa tur studiante.”

Hopi biaha ora studiantenan bay stage, EPB tin un tiki dificultad cu nan ta bin back pero si kier motiva y pidi tur hende tiki pasenshi. “Na cierto momento e studiante mester por caba si y despues cu e tin e gana pa por sigui studia, pa e bay sigui studia pasobra esey nos ta desea sigur pa nos studiante y pueblo pa sigui crece den enseñansa.” Hopi biaha, segun Sr. Mathilda, ta purba soluciona un problema rapidamente pero esaki ta haci cu ta crea un otro problema riba dje. Si por tin e posibilidad cu e studiante hunto cu e compania por sigui desaroya ta algo cu lo ta hopi great.

“Nos studiantenan actual aworaki hopi biaha ta cabando trempan, e sistema moderno aki ta yuda den otro forma unda cu e muchanan por ta mas ekipa pero mas na un nivel mas halto pa pasa nan aña di estudio miho.”

E scol tin algun reto den cantidad di docente y ta den combersacion pa por tin algun docentenan. Ta buscando cierto docentenan ainda manera docente di Ingles tin mester urgente, y tambe docente pa Bouwkunde. Ta bezig si cu e fundacion y Directie Onderwijs pa zorg tur studiante haya nan les debidamente.