Bureau City Inspector: ‘Hende ta haya multa y tiramento di sushi den naturalesa pariba di brug ta birando menos’


Manera ta conoci, nan tabata situa na Pos Chikito pero mirando cu contract a yega su temporada, a cuminsa preparacionnnan pa muda unda a haya un miho prijs y oferta tambe. Un noticia positivo cu reportero di Bon Dia Aruba a haya for di Bureau City Inspector ta cu a ripara recientemente tiramento di sushi den algun areanan di naturalesa pariba di brug ta birando menos, y multanan a cuminsa cay pa esaki keda asina.

Te na e momentonan aki no tin e parti di comunicacion completamente cla ainda pero esnan cu ta desea di yega cerca por bini na e oficina na Ponton pa bin duna nan reclamo. “E edificio nobo ta bon amplio pa loke ta e parti di e trabao aki y sigur tambe nos tin cu bisa cu e ta cerca den ambos banda, tanto pariba como pabao, y asina cu esunnan cu ta desea di bin ta bon bini,” sr. Rosel ta expresa. Manera ta conoci, City Inspector a realisa nan accion di autonan bieu na San Nicolas cual nan ta raporta cu a bay bon. Tur e accionnan pa locual ta auto bieu, autonan para ariba diferente caminda, tur esakinan ta bay continua pa loke ta e limpiesa. Pa motibo di e mudansa recien aki nan mester a para nan accionnan un rato pa por a establece nan mes bon prome den e edificio y for di akinan sigui cu tur loke ta e planificacion pa e resto di 2022.

E inspectornan ta sigui cu nan trabaonan regular tanten segun sr. Rosel. Luna di September venidero awor ta cuminsa back cu tur accion y ta pidi comunidad pa tene cuenta cu lo bay cuminsa pronto den bario di Pos Chikito cu Savaneta, pa asina por haci e limpiesa di e autonan bandona na e areanan aki. “Ora nos tin nos liña di telefon sigur nos lo haya mas yamada y nos lo pasa bishita pa papia cu e personanan aki.” Por manda un email tambe libremente na info@bci-aruba.com pa asina revisa mensahe y laga inspectornan bishita e parti desea pa wak kico ta tuma lugar.

Hende a haya multa y tiramento di sushi den naturalesa ta menos
 Parke Nacional Arikok a cuminsa pone borchi na diferente caminda manera na Franse Pas por mira e borchinan di no tira sushi, e ideanan pa continua cu esaki pa futuro ainda ta riba mesa. “Manera entre otro na Grapefield of na antena di molina di coriente, na weg fontein eybanda, hopi hende tabata tira sushi pero nos a bin descubri y haya nomber di personanan cu a haya multa riba esaki cu tabata tira sushi eynan. Actualmente esaki a baha man bastante,” segun sr. Rosel. Bureau City Inspector ta contento di por traha conhuntamente cu Serlimar riba e trabaonan aki pa motibo cu ora topa cu e sushinan aki, ta tuma contacto mesora cu Serlimar y den bon cooperacion ta manda un ploeg pa bay recoge e sushinan aki.

Un tempo atras por corda con reportero di Bon Dia Aruba a bay topa cu Bureau City Inspector den area di Seroe Colorado unda a topa cu un cantidad bastante grandi di sushi cu a wordo laga atras. Esaki a disgusta hopi hende den comunidad cu tabata hopi rabia riba e mal bista cu esaki ta duna na nos areanan di naturalesa cu turistanan ta bishita hopi. Otro problemanan si ta persisti ainda, manera dumpnan ilegal. Bon Dia Aruba a raporta aña pasa rond di e mesun temporada aki aproximadamente 11 dump ilegal na e area di Butucu y den vecindario di Palo Marga.

E problema di dumpnan ilegal sigur ta uno cu ainda falta hopi pa traha riba dje pa reduci esakinan rond di nos isla, mirando cu ta parce cu varios hende ainda ta sigui cu esaki y no ta mustra di tin miedo mes di un multa, entre otro.

Minister Ursell Arends a bishita e localidad nobo di Bureau City Inspector y por bisa cu tin e problematica aki den bista, remarcando cu: ‘e momento tabata oportuno considerando e rol importante cu BCI mester eherce den e maneho di desperdicio nobo cu a ser crea.’

E mandatario a enfatisa cu e ta contento di por mira BCI re-aloca na un caminda mas central unda cu comunidad por yega mas cerca di nan y dentro di poco lo tin mas informacion positivo. “E rol importante cu BCI lo hunga pa loke ta trata refuerso di naturalesa den su totalidad,” e mandatario ta expresa.